GIILANG bodegero sa bulto-bultong shabu nadakpan sa buy-bust sa mga sakop sa City Drug Enforcement Unit sa Cebu City Police Office alas 5:45 sa Huwebes sa hapon, Pebrero 20, sa 6th street, Barangay Apas, Siyudad sa Sugbo.
Ang suspek giila nga si Elmer Bas Gallarde, 35, alyas Bodol ug Bordz, taga JM Basa street, Barangay Sawang Calero, Dakbayan sa Sugbo.
Siya nalakip sa high value target sa regional level diin siya giingong motago sa kinilo nga gituohang shabu gikan sa ilang main source sa kaulohan.
Nakuha gikan kaniya ang 3,005 gramos sa gituohang shabu nga mobalor ang tanan og P20.4 million base sa Dangerous Drugs Board (DDB) value.
Nangulo sa buy-bust si Police Major Jonathan Taneo, hepe sa CDEU sa CCPO.
Matod ni Police Colonel Engelbert Soriano, hepe sa kapulisan sa Siyudad sa Sugbo, nga resulta kini sa ilang gipalawman nga surveillance ug gipahugtan pa nga anti-drug operations sulod sa 72 ka oras.
Gawas niini, aduna pay gihimong mga follow up operation ang iyang mga sakop nga posibling madugangan pa ang nakuhang tulo ka kilong shabu.
Karong adlawa, ang direktor mismo sa Police Regional Office 7 (PRO), Police Brigadier General Albert Ignatius Ferro, mopresentar ngadto sa media sa mga nangadakpan sa dungan nga anti-drug operations sa kapulisan sa dakbayan.
Una nang nimando si Soriano sa iyang mga chief of police nga ila pang palawman ang ilang monitoring.
Gukdon kadtong mga naa sa listahan nga nalambigit sa illegal nga drugas sanglit nagtuo sila nga daghan pa kaayo ang supply sa illegal nga drugas sa Dakbayan sa Sugbo.