GIPASABOT sa tagdumala sa “Angkas” nga wala sila’y dautang gihimo ug igo lang nagtanyag og serbisyo sa laing pamaagi sa transportasiyon ngadto sa katawhan sa Cagayan de Oro.
Gibutyag ni Angeline Tham, founder ug CEO, nga dugay na nga nagsugod ang habal-habal dinhi sa Mindanao ug igo lang nila nga mas gipalambo ang halab-habal industry.
“What we’re doing is not anything different, what we’re trying to do is professionalize the habal-habal industry, to help make things safer, more efficient, provide training to trainings to bikers and passengers,” matud ni Tham.
Gidugang pa niini nga igo lang usab sila nga nitabang sa katawhan pinaagi sa paghatag og maayong serbisyo sa transportasiyon aron nga mapasayon alang sa mga pasahero.
“We are just providing alternative means of transportation to people,” dugang pa.
Samtang hugot ang pagsupak sa transport group labi na ni Luzminda Lalaine Escobidal, manager/tsirman sa P.N. Roa Canitoan Transport Cooperative.
“Karon atong ipadagan ang angkas? Stupidity man na, hinangal na nga klase mao na, nag-file mi og petition sa city council nga dili gyud sila pasudlon,” matud ni Escobidal.
Nasayran nga uyon usab si Konsehal Teudolfo Bong Lao, tsirman sa Public Utility nga babagan kini tungod kay makaapekto kini sa modernization program sa gobyerno.
Gipasabot usab ni Regional Director Aminoden Guro sa Land Transportation Franchising and Regulatory Board (LTFRB) nga kulang nalang nga ma-inpeksiyon ang mga sakyanan aron hingpit na nga makapadagan apan naa usab kini sa lokal nga kagamhanan kung magpadala og resolusiyon ngadto sa Technical Working Group (TWG) ug depende sa mamahimong desisyon niini ilabi na kung makitang duna kini epekto sa programa sa gobyerno.
“Ang kulang nalang to inspect the unit, i-allow na dayon sila, naa ra na sa atong local government unit kung magpadala sila og resolution sa atong TWG,” matud ni Guro.
Gitakdang magdagan ang 925 ka unit sa “Angkas” ilabi na kung ma-inspeksiyon na kini karong semanaha isip pilot project nga gi-istudyohan pa sa TWG hangtod Marso 23 apan depende usab sa TWG kung malugwayan.
Giingong posibleng magdagan usab ang joyride sa Cagayan de Oro nga anaa sa gatos kapin apan wala pa kini nakapasa og kompleto nga mga dokumento samtang wala pa sa MoveIt.
Nasayran nga naghangyo ang tag-iya mismo sa “Angkas” nga makasugod na.