DUL-AN tunga sa milyon nga kantidad sa gituohang shabu ang nakumpiska gikan sa usa ka lalaki sulod sa usa ka motel niadtong Pebrero 20 mga alas 3 sa kaadlawon sa Barangay Kauswagan, dakbayan sa Cagayan de Oro.
Sikop si Rio Belocuro, Directorate for Intelligence (DI), 39, taga Osmeña Street, Barangay 26 ning siyudad.
Usa ka buy-bust operation ang gihimo sa hiniusang pwersa sa Regional Drug Enforcement Unit (RDEU) ug Police Station 4 (PS4) sa Carmen hinungdan sa pagkasikop ni Belocuro.
Human sa pagsusi nakuha usab gikan niini ang anaa sa 60 gramo sa shabu nga gibanabanang anaa sa P408,000.
Gibutyag sa kapulisan nga ang suspetsado taod-taod na nga gi-monitor kinsa wala kini trabaho gawas sa pagpamaligya sa ilegal nga druga ug nihulip kini sa iyang asawa nga giingong unang nasikop.
Samtang aminado usab ang suspek nga gapamaligya kini og ilegal nga druga tungod sa kalisod ug gani nagmahay na sa iyang pagkalambigit niini.