SUPERBALITA CEBU

P70M drugs; 289 ka armas nasakmit

MOABOT og P70.7 million nga balor sa illegal nga drugas nasakmit sa kapulisan sa dakbayan ug lalawigan sa Sugbo atol sa dungan nga Synchronized Enhancement Managing and Police Operations (Sempo) sulod sa 72 ka oras.

Nakasikop usab sila og 483 ka mga tawo, 344 niini nasikop pinasikad sa warrants of arrest, lakip na ang 59 ka high value individual sa illegal nga drugas, 221 street level individual.

Nakasakmit usab silag 289 ka loose firearms, 186 niini nakuha sa Cebu Provincial Police Office samtang 103 sa Cebu City Police Office (CCPO).

Sa kapin P70 million nga balor sa illegal nga drugas, nakuha ang P60.7 million niini sa Dakbayan Sugbo ug Consolacion, diin nakasakmit silag dul-an sa siyam ka kilo sa gituohang shabu.

Samtang ang CPPO nakakuha og kapin sa usa ka kilo sa gituohang shabu nga mobalor og P7,761,180.00 ug P1 million nga balor sa marijuana.

Bodegero, Courier

Unang nakuhang binulto nga gituohang shabu gikan sa usa ka bodegero sa illegal nga drugas nga si Elmer Bas Gallarde sa 6th Street, Barangay Apas, Dakbayan sa Subo.

Gisundan kini sa kapin lima ka kilo sa Consolacion.

Matod ni P/Col. Engelbert Soriano, adunay koneksyon ang duha tungod kay human madakpi si Gallarde, ilang nahibaw-an asa gikan ang illegal nga drugas.

Gihimo dayon ang follow up operation sa Santa Lucia, Barangay Poblacion, Consolacion.

Niresulta kini sa pagkasikop ni Kirby Abanilla, lumad nga taga Concepcion Street, Barangay Suba, Dakbayan sa Sugbo.

Si Abanilla maoy drug courier gikan sa Luzon nga mohatod sa butang ngadto kang Gallarde aron ipang-apud-apud sa mga drug player sa Dakbayan ug lalawigan sa Sugbo.

“Ang description natin sa kanya yung nakuhanan natin ng 3 kilos according sa ating questioning and information from some other sources bodegero talaga sya, and doon sa 5 kilos, talagang courier talaga ito. Dealer talaga to directly connected to the suppliers,” matod ni Soriano.

Aduna nay gipang tug-an silang Gallarde ug Abanilla nga di pa ikabutyag sa kapulisan alang sa follow up operation.

Dugang ni Soriano nga wa molutaw ang mga ngalan sa duha, apan nakit-an nila kini sa mga cellular phone sa mga nangadakpan atol sa mga anti drug operation sa matag police station sa dakbayan sa Sugbo.

Sa pangutana nganong sa Barangay Apas gihimo ang paghatag sa illegal nga drugas nganong di sa ilang balay sa Sawang Calero, matod ni Soriano nga dako ang posibilidad nga kompyansa kini tungod kay adunay kaila nga mahimong daganan kon magkinaunsa ang iyang pagbaligya sa illegal nga drugas.

“Usually sa mga ganyan, di sila magbebenta malapit sa bahay nila. Posibling may kakilala ito sa lugar na yan na maari nyang puntahan matapos ng bayaran,” matod ni Soriano.

Triad

Matod ni Police Brigadier General Albert Ignatius Ferro, hepe sa Police Regional Office 7, nga ilang gisubay sa pagkakaron nga posibling gikan sa kaulohan ang nasakmit nga illegal nga drugas tungod sa packaging nga Chinese tea bag.

Iyang gihulagway nga susama kini sa nakuhang illegal nga drugas sa National Capital Region Police Office ug Police Regional Office 8.

Dugang ni Ferro nga sukad kaniadto, ang Chinese tea bag gikan sa Myanmar, apan wa pa silay impormasyon kon ang matang sa gituohang shabu nag gikan ba sa maong nasud.

Usa sa mga kasaligang tinubdan sa Campo Crame niingon nga ang giila nga Asian El Chapo nga si Tse Chi Lop, usa ka Canadian national, maoy nag supply sa illegal nga drugas sa Pilipinas.

Apan matod ni Ferro nga di pa nila kini makompirmar sa pagkakaron, apan dako kini nga posibilidad tungod sa iyang cartel nga nakasulod na sa nasud.

“There’s a big possibility because the Golden Triad has been in our country long long time ago. Remember that the major players here in our country are the Mexican Sinaloa cartel, the Chinese and Filipino Chinese drug cartel, the bamboo triad and the West African drug trafficking syndicates,” pasabot ni Ferro.

Gisalikway hinuon niya nga adunay shabu laboratory sa Central Visayas bisan sa kadaghan nga nakuha sa kapulisan.

Siya nagtuo nga gihimo lang nga transshipment ang Sugbo sa illegal nga drugas alang sa Mindanao ug pipila ka bahin sa Kabisay-an.

Gidayeg ni Ferro ang hepe sa kapulisan sa dakbayan sa Sugbo ug probinsya nga nahimong malampuson sa ilang dungan nga anti criminality operation.

Gawas sa drugas ug armas, nak sikop usab silag 449 ka mga tawo nga nalambigit sa illegal gambling, 347 niini sa probinsya samtang 102 sa Dakbayan sa Sugbo.

Talisay

Moabot sa 90 ka mga tawo nadakpan sa dakbayan sa Talisay sa Sempo ubos sa Oplan Limpyo Talisay, sa tulo lang ka adlaw, sukad Pebrero 18 hangtod Huwebes sa gabii, Pebrero 20.

Ang 41 niini nasikop tungod sa pagkalambigit sa ginadili nga drugas, sa 18 ka mga operasyon.

Upat niini ang nasikop Huwebes sa gabii sa Barangay Lagtang, Tabunok ug Tangke.

Nalakip na usab sa ihap ang Sangguniang Kabataan (SK) chairman sa Lawaan III, Guendolyn Luage ug amahan niini nga si Francisco.

Adunay natala nga patay sa operasyon human giingon nga nisukol sa mga pulis. Nakasakmit sila og 68.13 grams sa shabu nga mobalor og P449,684.

Samtang ang laing 42 ka mga tawo nasikop tungod sa illegal gambling. Laing pito ka mga wanted person usab nasikop ug usa ka loose firearm ang nasakmit, usa usab ang gi-surrender. (AYB, BBT, FMD, GPL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph