LAING pagsuway ang sagubangunon sa San Miguel Beermen human naangol ang lain na sab nilang pambato nga si Terrence Romeo atol sa ilang tuneup game batok sa Alaska Aces.
Naangol ang tuo nga tiil ni Romeo human siya nakatunob og exercise equipment sa ilawom nga bahin.
Dili pa lang dugay, ang Beermen natangtangan na sa labing dako nilang haligi human nabalian og bukog sa iyang tiil ang Sugboanong higante nga si JuneMar Fajardo.
Labing seguro, dili makapakita og aksyon si Fajardo sa Philippine Basketball Association (PBA) 2020 Philippine Cup nga sugdan karong Marso 8 ug posible sa kinatibuk-an gyud nga season.
“Pagkatapos ko tumira, natapakan ko yung parang bike na bakal. Pag-step ko, may tumunog eh,” matod ni Romeo sa interbyu Spin.ph.
“Sana tapilok lang talaga.”
Ang laing sinaligan sa Beermen nga si Marcio Lassiter wala na miapil sa ilang praktis gumikan kay nabuak ang ilong niini.
Hinuon gipasalig ni Lassiter nga moduwa siya inig sugod sa Philippine Cup ug magsul-ob lang siya'g mask. (ESL)