SUGDAN karong alas 4:00 sa hapon ang 2020 MS Motosuit-Lou Ornopia Cup Open Basketball Tournament sa Calambua covered court sa lungsod sa San Remigio, Cebu.
Unom ka teams ang magkombati sa torneyo, nga gipaluyohan sa provincial board members nga sila si Francis Salimbangon ug Kerry Shimura, vice mayor Al Pestolante, Diosdado Navarez ug sa MS Motosuit, RMO Motor Parts, F & FO Motor Parts, NF Enterprises, LMO Motor Parts, General Merchandise, ug N-Style.
Ang partisipanteng teams mao ang Team Mabuhay ni Mamai Arnado. Olilab Oil, Inc. ni Jay Olivar, Lelah Construction/SBM Alumni, Saint Francis-Danao ni Ryan Perez, T & T Slasher ni Loloy Tagalog, ug Tabogon PNP nga pangulohan ni P/Lt. Luciano Autida Fuentes.
Makabulsa og P20,000 ang mahimong kampiyon sa torneyo, makabira og P15,000 ang 2nd placer ug P10,000 sa 3rd placer.
Mosubay ang torneyo sa single-round robin sa eliminasyon unya ang mopatigbabaw nga upat human niini mao ang makasulod sa crossover semi-finals.
Aduna sab mga pasidungog nga ipanghatag nga mao ang Most Valuable Player, Mythical Five, ug Sportsmanship.
Ang usa ka buwan nga kompetisyon nagsilbeng tipik sa mga kalihukan sa tinuig nga piyesta sa Calambua karong Abril 17-18 nga pangilin sa mahal nilang patron nga si San Vicenter Ferrer.
Si Renante Ubay maoy modumala sa torneyo. (ESL)