(“Karma is like a rubber band. You can stretch it so far before it comes back and smacks you in the face.”-- Anonymous.)
Unsa bang hinampaka? Giithan man ko
sa itom nga pati o galansiyang ba kaha
tong langgama! Paghangad ko, tataw kaayo
ang lubot sa kagwang. Kutob ra tawon ko
sa hait nga pagtutok, buot moluglog
ug mohimulbol sa pak-an.
Mopalayo na unta ko apan unsa bang
pagkaunsaa,,, kalit lang dunay natagak
sa akong atubangan.
“Pak, tua ra!” Kaluparon ang tingog sa bata
nga gangisi gikang nagbinat sa iyang tirador.
Taudtaod, mipaka akong selpon ug misipa
ang danguyngoy sa akong asawa.
“Nadisgrasya si Inday, natagakan og lubi!”
Mao rag kilat ang mitumaw nga kahilom
samtang naunlod akong panan-aw diha sa buak
nga ulo sa langgam duol sa akong tiilan.