Wanggits gitunto’s biyuda

Wanggits gitunto’s biyuda

DAVAO DE ORO -- Dako ang pagtuo sa edarang ulitawo nga nabudol o nailad siya sa babayeng ka-textmate nga nahanaw nga daw bula human natangag ang kuwarta nga gipangayo.

Ang 18-anyos nga nagpatago sa pangalang “Karl” nagsulti sa dihang personal nga nahinabi sa SunStar Super Balita nga ang iyang “lolo” nga igsuon sa iyang lola nga gitago sa pangalang Marcial, 63 anyos, nagtrabaho isip piniyalan sa umahan sa lungsod sa New Bataan, dunay nakaila nga biyuda pinaagi sa text.

Matud pa nga ang maong biyuda ginganlan og Evelyn ug nagsulti nga nag-edad siya og 42-anyos nga taga siyudad sa Panabo.

Nakaila matud pa ni Marcial ang biyuda dihang nakapalit siya og selpon gikan sa mangayuhay og selpon sa ilang dapit.

Gibutyag nga nahimong mabulukon ug inspirado ang matag-adlaw sa kinabuhi ni Marcial sukad nga nakaila niya ang ka-textmate nga matud pa nga sa sige’g text-text, nagkauyab ang duruha, bisan og wa pa sila magkita sa personal.

Sumala pa nga gipangayoan og P1,000 sa biyuda si Marcial kay aduna kunoy kompromisong bayrunon apan gumikan kay gipit usab sa kuwarta niadtong higayona, tulo ka gatos ka pesos ra ang napadala.

Apan paglabay sa usa ka semana, gipangayoan na usab og kuwarta nga kantidad og P1,500 hinungdan nga napugos ang edarang ulitawo pagbaligya sa binuhing pato nga mihalin og P200.

Ug aron nga madugangan pa kini, nanakop siya og baki sa humayan ug gibaligya ug nakahalin og P380.

Si Karl nagbutyag nga sa dihang gipadala ang maong kuwarta nga halin sa pato ug baki, nasuko ang biyuda ug giingnan si Marcial nga kuripot ug wa na mi-text.

Apan paglabay sa tulo ka adlaw, mi-text pag-usab ug nangayo’g pasaylo ug nagsulti nga buot kining makigkita og personal sa siyudad sa Tagum.

Dayon, nangayo na usab og kuwarta nga pamasahe gikan sa siyudad sa Panabo ang biyuda aron nga makaadto og Tagum apan wa mibungat og kantidad.

Tungod kay bag-ong suweldo ang lolo, nagpadala og P340 sa biyuda.

Gibutyag nga nangandam pag-ayo si Marcial sa pakigkita sa iyang ka-textmate nga sumala pa nanghulam pa siya og barong ingon man sinaw nga sapatos sa iyang kumpare.

Apan si Marcial nadismaya kay wa mibutho ang ka-textmate nga biyuda ug di na usab makontak ang numero sa selpon niini.

Nagtuo si Marcial nga giilad siya sa ka-textmate apan ang apo nga si Karl nagtuo nga nadismaya ang babaye sanglit, way igong kuwarta ang iyang “lolo” hinungdan nga wala siya gibutho sa biyuda sulod sa usa ka mall sa siyudad sa Tagum.

Naluoy siya sa iyang lolo kay pormado kaayong niadto sa mall nga nakabarong ug taas pa gyud kaayo og takong ang sapatos nga pinasinaw gamit ang mantika.

Related Stories

No stories found.
SunStar Publishing Inc.
www.sunstar.com.ph