GIABISOHAN sa mga opisyal sa Cebu South Bus Terminal (CSBT) ang tanan nga mga pasahero nga mopauli nga mosubay sa mga kamandoan sa terminal aron mahimong hapsay ang biyahe.
Tungod kay long weekend, gipaabot sa management nga moabot og 50,000 ka mga pasahero ang modagsa sa terminal.
Gihangyo ni Carmen Quijano, pangu sa CSBT, nga mosulod sa terminal ug di mag-atang sa gawas ug mobabag na hinuon sa agianan sa Natalio Bacalso avenue sa Dakbayan sa Sugbo.
Kini tungod sa reklamo nga nadawat niya kabahin sa mga pasahero nga mag-atang sa exit area sa terminal ug diha na mo sakay sa mga minibus nga mo guwa.
“Kana man gud naay mga pasahero gyud anha na mag tapok sa exit imbis nga mosulod dinhi sa terminal. Magdasok na man hinuon diha unya maluoy ta og naay senior citizen nga madam-agan kay huot na”, matod ni Quijano sa Superbalita Cebu pinaagi sa tawag.
Hinungdan nga iyang gihangyo ang mga minibus driver nga di na pasakyan og pasahero sa exit area aron malikayan ang inilogay ug kagubot sa pagsakay. May mga security guard na usab nga gibutang sa exit area aron maoy mosita sa mga pasahero.
Matod ni Quijano nga kinahanglan nga tahuron sa mga pasahero ang bag-o nga pamaagi sa terminal nga mao ang “no ticket, no entry”.
“Ang gobernador nato nagsakripisyo sa kita sa mga naninda unta sa CSBT, pero gipadaplinan gyud nato aron nga makalingkod ang mga pasahero, unya nganong dili man gyud mosulod? Mosubay gyud ta kay daghan kaayo ang lingkuranan, aircon pa naay CR naay kahunawan”, matod ni Quijano.
Apan tungod kay gilauman na sa CSBT ang daghan nga pasahero, isyuhan nila kini og passenger pass.
Samtang sa padayon nga pag-obserbar sa mga doktor sa novel coronavirus (COVID -19) giabisohan ang mga pasahero nga magdala og kaugalingon nga alcohol ug sanitizers aron malikay sa sakit.
Kinahanglan nga mosubay usab ang mga bus operator sa protocol paghinlo ug pag-disinfect sa mga sakyanan aron malikayan ang pagkatap sa bisan unsa nga sakit nga posibleng makuha sa mga pasahero atol sa pagbiyahe. (ANV)