Talisay nagkonsulta pa; Lapu-Lapu mag-color coding

HAWANAN SA TRAYSIKOL. Ang mga local government unit (LGU) nagdali karon sa pagpangitag paagi unsaon nga di na makaagi sa highways ang mga traysikol subay sa mando sa Department of the Interior and Local Government (DILG). (File photo)
HAWANAN SA TRAYSIKOL. Ang mga local government unit (LGU) nagdali karon sa pagpangitag paagi unsaon nga di na makaagi sa highways ang mga traysikol subay sa mando sa Department of the Interior and Local Government (DILG). (File photo)

SIYUDAD sa Talisay wa pa hingpit nakapatuman sa estrikto nga pagdili sa mga tricycle ug pedicab sa national highway.

Kay nagpadayon pa ang gihimo nga pakigdayalogo ug konsultasyon sa kagamhanan ngadto sa libuan ka mga drivers nga maapektuhan.

Matod ni Jonathan Tumulak, kinsa maoy traffic czar sa Talisay City, nga gipakigtagbuan na nila ang kapin sa 10 ka mga kapunungan sa mga tricycle driver ug pedicab, sugod pa lang niadtong Enero.

Giangkon ni Tumulak nga di sayon kay adunay mga driver nga magdumili, apan padayon ang ilang pagpasabot nga kamanduan usab sa ulohan nga buhatan.

Nipagawas og kamanduan si Department of the Interior and Local Government Secretary Eduardo Año ngadto sa local chief executives sa estrikto nga pagpatuman sa ban sa mga tricycle, pedicabs ug motorized pedicabs sa national highway.

Ang pagtukod sa tricycle task force nga maoy magbuhat sa tricycle route plan sa ilang lugar.

Kini subay gihapon sa pagpatuman sa road clearing.

Gitug-an ni Tumulak nga karong Lunes, Pebrero 24, magtagbo sila sa DILG officer sa Talisay, uban na ang laing ahensya sa gobyerno, sama sa Department of Social Welfare and Services, alang sa pagtabang sa posibleng mawad-an og panginabuhian nga driver.

Sa inisyal nga gihimo sa kagamhanan sa Talisay, matod ni Tumulak nga sila sa matag kapunongan sa mga trike ug pedicab driver ang mohatag og ilang proposed nga rota sa ilang mga lugar nga wa na sa national highway.

Himuon ang dugang konsultasyon ug dunggon sa konseho aron mahimong legal ang tanan.

“Dili sad mi diretso nalang mo-dili kanila nga mopaagi sa highway kay sud sa dugay nga tuig na pud baya na sila diha. Amo gipasabot sa DILG, nga kinahanglan sa gyud nag consultation, dialogue ug sharing of ideas aron hapsay. Kay kon diretso ta moresulta unya sa kagubot ug kasamok, adto ra gihapon na paingon sa gobyerno,” pasabot ni Tumulak.

Color Coding

Wa na unyay mga traysikol sa Dakbayan sa Lapu-Lapu nga mamasahero gawas sa ilang rota kon hingpit na unyang ipatuman ang proposal kabahin sa pag-color coding sa tanang units.

Kini magsilbing temporaryong solusyon sa kagamhanan ilabi na nga mipagawas og kamanduan ang DILG ngadto sa matag local government unit nga ang tanang slow moving vehicles ilabi na ang traysikol gidili nang motadlas sa national roads o highways.

Giangkon ni Lapu-Lapu City Mayor Junard Chan nga adunay mga traysikol sa dakbayan nga mag agi-an sa highways gumikan kay way laing kalutsan sa rota nga ilang subayon, gikan ug paingon sa ilang destinasyon.

Gitumbok ang Basak road nga adunay mga traysikol nga mogamit sa M. Patalinjug Avenue paingon sa merkado publiko, Barangay Poblacion balik sa dapit diin sila maggikan.

Nagkanayon si Chan nga sa color coding, ang matag rota sa siyudad adunay designated color aron dali mailhan kadtong mobiyahe gawas sa iyang naandan nga rota.

“Dili na pwede kanang strike anywhere (rota),” matod pa ni Chan sa dihang nahinabi sa Superbalita Cebu.

Usa ka nakatampo sa kahuot sa trapiko mao ang kadtong mga traysikol nga motadlas sa bisan asa nga rota.

Ang karsada sa Basak adunay gibutang nga tricycle lane atol sa miaging administrasyon.

Apan, base sa namatikdan sa buhatan sa City Traffic Management System (CTMS), 80 porsiyento sa mga traksikol drayber ang mogamit niini.

Samtang ang hepe sa CTMS, Mario Napule, nagkanayon nga padayon nilang gitun-an ang proposal sa color coding ingon man paghipos sa tukmang data sa passenger volume count.

Sa higayon nga masayran ang gidaghanon sa pasahero sa usa ka area, kahatagan sab nila sa tukmang gidaghanon sa public transportion ang maong dapit.

Gipanglantawan sab nga sa higayon nga estriktuhon, di na makaagi ang mga traysikol sa dagkong dalan hayan mahitabo ang “hatod-hatod system” diin kutob nalang sa eskina ihatod ang pasahero aron makasakay og multicabs o modern jeepneys sa Lapu-Lapu.

Gibana-bana nga adunay 3,500 ka mga tricycle units ang nagdagan sa kadalanan sa mainland Lapu-Lapu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph