Sunog sa 2019 midoble itandi sa 2018

DUL-AN 467 ka mga sunog ang natala sa Cebu City Fire Station sa 2019 sa Siyudad sa Sugbo.

Kining maong kadaghanan doble itandi sa 2018 nga anaa lang sa 269 base sa Fire Incident Monitoring Board. Sa maong mga insidente, adunay kapin sa 600 ka mga balay ug establishemento ang naugdaw.

Gibana-bana usab nga anaa sa P18, 050, 625 ang gibana-banang danyos sa 2019.

Kasagaran nga mga hinungdan sa sunog mao ang electrical short circuit ug ang pagduwa-duwa sa mga bata og posporo diin mao usab ang hinungdan sa dagko nga mga sunog. Ang Abril mao ang labing daghan og sunog sa 2019.

Dunay 73 ka mga sunog sa maong buwana, adunay danyos nga P1.4 million.

Ang Marso, ang Fire Prevention Month, mao ang nagsunod sa buwan nga labing daghan og sunog. Duna kini 70 ka mga insidente ug danyos nga P1.8 million.

Ang labing gamay nga insidente sa sunog nga nahitabo mao ang Disyembre diin aduna kini 22 ka mga insidente ug adunay danyos nga P297,800.

Illegal settlers

Saysay ni F03 Philip Fuderanan, chief sa public information section sa Cebu City Fire Station, kasagaran sa mga lugar nga permi masunogan mao ang adunay illegal settlers sanglit sikit-sikit ang mga lugar niini ug puros light materials ang gigamit sa pag-gama sa mga balay.

Dungag ni Fuderanan nga ang Bureau of Fire Protection kauban ang Cebu City Fire Station adunay programa nga “Oplan Ligtas Pamayanan.” Niini, ang mga fire personnel magsuroy-suroy sa mga balay ug maghimo og simulation drill sa matag barangay aron makita kon asa sila moagi ilabi na ang sikitsikit nga mga lugar.

“Rest assured that the BFP and the Cebu City Fire Station in particular working double hard para ma address ning problemaha kay nagka moderno ang panahon, nagka daghan ang sunog,” saysay niya.

Nag-unang hinungdan

Kining pagdaob og basura, electrical loose connection, pagpanigarilyo, electrical overloading ug open flame sa pagluto, mao ang nag-unang lima ka mga rason nganong grabe ang sunog nga nasinati karon sa Sugbo.

Gani niadto lang 2019, natala sa Bureau of Fire Protection (BFP) Central Visayas ang 1,310 ka insidente sa sunog sa Sugbo, diin sumatotal adunay danyos nga P81,115,511

Sa datus, anaa sa dakbayan sa Sugbo, Mandaue, Talisay, Todelo, ug lungsod sa San Fernando ang daghang kaso sa sunog sa Sugbo niadtong 2019.

Matod ni BFP 7 information officer ug Cebu Province Fire Marshal Superintendent Fritzie Manatad nga tungod sa daghan sa wire sa kuryente mao ni ang usa sa rason nga dugay sila maka-responde sa sunog.

“Delay sometimes by electric utilities in cutting off power lines in location of fire incidents, traffic, absence of hydrants in congested areas,” matod ni Manatad.

Dugang ni Manatad nga natuman hinuon ang road reblocking hilabi na sa mga hagip-ot nga dapit aron dali ra makasulod ang mga bombero kon pananglitan nga niagi na kini og sunog. (JCT,HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph