NAAGIAN nako ang grupo sa mga batan-on nga pulos naka puti og t-shirt human ko maghatod sa akong anak sa usa sa mga tunghaan sa Osmeña Blvd. sa dakbayan sa Sugbo.
Mga aplikante sila sa pagka pulis. Sama sa naandan mas daghan ang lalaki kay sa mga babaye. Sila ang molangkob sa bag-ong qouta alang sa Central Visayas nga dumalahon sa Regional Training School sa Philippine National Police.
Nihunong ko sa ilang nahimutangan ug nitimbaya sa mga babaying aplikante nga nag-una sa formation sa gawas sa Camp Sergio Osmeña Sr., ang headquarters sa Police Regional Office-7.
Silang tanan nagpaabot sa oras aron ipadayon ang mga tahas isip kabahin sa ilang pagpangaplay. Niadtong nagtrabaho pa ko isip reporter di gyud nako sipyaton ang paghimo og estorya labot niining pagpangaplay sa pagka pulis.
Usa ni sa mga paborito nako nga topic kaniadto. Basta maka kita na gani ko og mga batan-on nga magtapok sa gawas sa gate sa kampo, mosulod dayon sa akong hunahuna ang bug-at kaayo nila nga tahas nga magsugod diha sa gate. Una, di sayon ang pagpangaplay. Ika duha, hilabihan ka dako sa gasto ilabi na niadtong gikan pa sa probinsiya unya mag-abang og kapuy-an dinhi sa siyudad.
Ika tulo, pwerteng kapuya ang training nga molanat og usa ka tuig sa dili pa ma-download sa mga estasyonan sa pulis. Ang uban gani nila mangutang ang mga ginikanan, mamaligya og kabaw ug ubang hayop ug mamrenda og yuta aron masustinihan lang ang panginahanglan sa pagpangaplay apil na ang pagpuyo ug pagkaon samtang nangaplay.
Tungod sa daghang isyu nga naglambigit sa mga pulis ilabi na niadtong mga nagpabadlong, kasagaran sa akong mga pangutana nila nahasandig sa ilang katakus sa pagserbisyo sa katawhan ug sa nasod. Ang pagsungasong sa daghang temtasyon diha sa panerbisyo, pipila lang sa mga unod sa akong interview nga akong gipaambit sa publiko.
Nindot kaayo paminawon ang ilang mga pasalig nga kong palaran nga madawat, kinasingkasing nga serbisyo ang ilang itunol ngadto sa katawhan nga maoy gipanumpaan sa dihang sa oathtaking ceremony nga magsilbing sognal nga sila usa na ka pulis bisan kong magsugod pa lang sa training. Pero subo nga palandungon duna gihapoy pipila nga nahisalaag. Ang uban sa akong gipang interview nga nagbinuotan karon mga masilakon sa ilang tagsa tagsa ka assignment.
Ang uban nakadawat og mga pasidungog. Ang uban nangahimo man ganing opisyal human makapasar sa pasulit isip lateral entry sa PNP.
Subo lang sab hunahunaon kay duna say nangatangtang sa serbisyo. Ang usa sa di nako makalimtan nga estorya nga akong gireport mao kadtong batch sa mga recruit nga nangaplay hangtod nga nisalmot sa oathtaking. Human sa ilang training wa damha nga nag-abot mi pag-usa didto sa Mactan Air Base sa usa ka seremonyas nga maghatod kanila sa Zamboanga City aron moapil sa nabaniog kaayo nga Zamboanga siege.