SUPERBALITA CEBU

ALA Gym Santisima vs Navarrete alang sa WBO Super Bantam title sa Vegas

TRAINING. Jeo "Santino” Santisima (tubaga), Michael “Bruce Lee” Domingo (wala, head trainer) ug Edito Villamor, ALA Gym chief trainer. (Hulagway gikan sa social media account ni Jeo Santisima)

SUPORTADO sa mga opisyales sa Muncipality of Aroroy, Masbate Province ang hometown ni ALA Gym Cebu boxer Jeo “Santino” Santisima ang iyang pagsulong sa Amerika.

Si Santisima mo-challenge sa bakus ni Mexican star Emanuel “Vaquero/Cowboy” Navarrete, ang World Boxing Organisation (WBO) Super Bantamweight belt.

Atol sa weigh-in, si Santisima ug Navarrete parehong mitamak sa insaktong 122 pounds weight limit.

Ang Navarrete vs Santisima undercard sa Deontay Wilder vs Tyson Fury - II para sa WBC Heavyweight title fight sa MGM Grand Arena sa Las Vegas, Nevada Sabado Pebrero 22, 2020 (Dominggo sa buntag RP Time) gidalit sa Top Rank, TGB ug Warriors Boxing nga isalida sa ESPN+ ug FOX PPV.

Si Santisima, 23 anyos power puncher adunay (19-2, 16KO), first time nga moaway sa US kinsa ginganlan nga Santino gumikan sa ka buotan nga bata sukad nahiabot sa ALA Gym Cebu.

Samtang si Navarrete nga usa ka knockout artist nagbitbit sa baraha nga (30-1, 26KO) modepensa sa ikalimang higayon.

Dili sayon alang ni Santisima ang pagharong kang Navarrete kinsa tulo na ka mga Pinoy ang gipangtumba.

Si Navarrete unang gipukan si Jhon Genino sa Lipa City, Batangas (TKO5), gisunod si Glenn Porras taga M’lang, North Cotabato (KO2) ug ang apo ni Flash Elorde nga si Juan Miguel Elorde (TKO4).

Apan sa pakighinabi ning tigbalita kang Santisima wala siya malisang sa Mexican.

“Naa siya (Navarrete) power, pero ako ani timing lang, counter, adjust sa duwa nya dili ta kumpyansa. First nako ni fight sa gawas pero no pressure lang, dream nako ni ang world title busa positive mindset lang ta,” matod ni Santisima sa Superbalita Cebu.

Si Jeo, adunay 50 amateur fights, misulod sa pro boxing sa edad nga 17 apan nagsugod sa pagtaud sa gloves sa edad nga 9 anyos, iyang amahan si Alex kanhi amateur boxer apan mag-uuma na karon sa ilahang dapit samtang adunay tindahan ang inahan ni Jeo.

Kuyog sa US ni Santisima iyang head trainer si Michael “Bruce Lee” Domingo, anaa sab si ALA Gym Chief trainer Edito Villamor ug ALA Promotions President Michael Aldeguer.

Sa pikas bahin ang mga Masbateños boxing fans magpanon aron sud-ungon ang ilang kaduho sanglit si Aroroy, Masbate Mayor Arturo “Turing” Virtucio, Vice Mayor Valentin “Val” Alonzo ug town council members mipasiugda sa live viewing sa fight ni Santisima vs Navarrete sulod sa Tico Maristela Sports and Cultural Center.

Laing mga opisyal nga misuporta ni Santisima ug mag-live viewing mao ang Masbate City ni Mayor Rowena Tuason ug Vice Mayor Ruby Morano.

Apil sab ang Municipality of Mobo, Masbate ni Mayor Raymund Osmundo Salvacion.

Lakip sa nagpakita sa support si Masbate 3rd district Congressman Wilton “Tonton” Kho ug mga kaubanan. (Daniel Quindao Guden, US Correspondent)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph