SUPERBALITA CEBU

Kiboy's mitipi sa ARQ sa Cebu City Charter Cup

CEBU. Ang kanhi PBA player nga si Hercules "Jojo" Tangkay sa ARQ Builders/KSB Glass nga milusot samtang misuway sa pagtapal kaniya si Vince Minguito sa Kiboy's Computer Solution niining aktoha. (Hulagway kuha ni Amper Campana)

GIBUNTOG sa Kiboy's Computer Solution ang ARQ Builders/KSB Glass, 88-80, sa panagtigi sa mga lider sa Cebu City Mayor Edgar Labella Charter Cup Biyernes, Pebrero 21, 2020, sa Cebu City Institute Gym sa Sawang Calero, Dakbayan sa Sugbo.

Sa kadaugan, ang Kiboy's (4-0) nakasiguro na og luna alang sa unang puwesto bisan unsa pay resulta sa ilang katapusang duwa batok sa Athalia (4-1) karong gabii.

Samtang ang ARQ Builders (3-1), sa ilang bahin, makigsangka usab sa Fighter 50 (3-1) aron ilogan ang ikaduhang puwesto.

Si Ted Saga ug Vince Minguito tagsatagsang mipugnit og 14 puntos, midugang og 13 si Adrian Lao ug tag 12 puntos usab sila si Harold Cincoflores ug Melvin Butohan alang sa Kiboy's kansang kadaugan nagsugod paghulma diha na sa tungatungang bahin sa fourth quarter.

Sayong miarangkada ang Builders ug nakaposte gilayon kini og 9-0 nga labaw sa pagsugod sa panag-engkuwentro sa dihang tagsatagsang mipabuto og tres sila si Ferdinand Lusdoc, W. Munos ug John Abad.

Gisira sa mga Builders ni coach Marvin Caro ang unang kanto, 26-17.

Apan nagsugod og sikit panagsangka sa dihang naghugpong sila si Cincoflores, Minguito ug Butohan.

Human mabiyai, 40-44, sa halftime, ang Kiboy's mipahagsa og 14-4 nga rally, ug ning higayona miayuda sa ilang opensa si Gabriel Cometa, Lao ug Ian Ortega aron imburguhon ang liderato, 54-50.

Ang layup ni Cometa ug ang duha ka jumpshot ni Minguito maoy mipabukad sa labaw, 76-67, 6:31 ang nahabilin sa fourth quarter.

Dihay mga pagsuway nga gihimo ang Builders nga makasikit og bali apan ang 75-81 nga rally mao ray pinakaduol nilang nahimo.

Si Jojo Tangkay nangulo sa Builders nga may 20 puntos samtang 14 puntos ang nahipos ni Abad alang sa napukan nga ARQ.

Sa sayo pa, nakapugnit sa ilang unang daog ang Athalia, human sa tulo ka sunodsunod nga pildi, pinaagi sa pagpukan sa wala pay daog nga LM Paragsa, 91-82.

Ang Fighter 50 nakaipsot usab sa mga kamot sa Aspa Formworks, 88-85, sa unang overtime nga duwa ning usa ka semanang kompetisyon nga gipasiugdahan sa Mayor's Office ug giayudahan sa Cebu City Sports Commission ubos sa liderato ni Edward Hayco ug executive director Amilo Lopez.

Si Atty. Rey Gealon maoy nagsilbing commissioner uban ni tournament director Allen Ceballos. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph