ISIP lamas sa naghinapos nga Cebu City Mayor Edgar Labella Charter Cup, ang Cebu-Casino Ethyl Alcohol sa Maharlika Pilipinas Basketball League (MPBL) mopakita og aksiyon sa usa ka exhibition games Dominggo sa gabii, Pebrero 23, 2020, diha sa Cebu City Sports Institute Gym sa Barangay Sawang Calero, Dakbayan sa Sugbo.
Kini mao'y gipahibawo sa mga nagpasiugda nga gipangulohan ni Allen Ceballos sa Mayor's Office.
Ikasangka sa Casino ang ARQ Builders nga posibling magpa-reinforced ni Jio Jalalon sa Magnolia Hotshots sa Philippine Basketball League (PBL).
"Amo nang gikasabot si Jio (Jalalon). Hopefully wala'y kausaban. Naa siya diri for three days kay paduwaon sab siya namo sa semifinals ug finals," matod ni Marvin Caro, coach sa ARQ Builders.
Wa hinuon mobutyag si Caro kon hingpit ba gyud nga tugotan si Jalalon sa Hotshots kinsa hugot na sab nga nagpreparar alang sa PBA All-Filipino conference.
Hinuon gawas kang Jalalon, mipasalig si Caro nga aduna pa'y lain silang kuhaon gikan sa Manila.
Anaa usab sa ARQ ang mga beteranong sila si Jojo Tangkay, Ferdinand Lusdoc, Reed Juntilla, John Abad, Jerrick Canada, Russel Moneva ug Manny Gabas.
Ang Cebu-Casino nga ubos na sa pagdumala ni coach Nonoy Falcasantos mosandig sa ilang regular mainstay nga sila si Raffy Oktubre, Harold Cortes, John Saycon ug Nichole Ubalde, Adrian Lao, Fletch Galvez, Joel Lee Yu, Zach Huang ug Jaybi Mantilla.
Dili moduwa ang Casino nga wala ang ilang star nga si Will Mcloney kinsa atoa na sa NLEX Road Warriors.
Sugdan ang Casino-ARQ encounter sa alas 8:30 sa gabii.
Sa preliminary game sa alas 6 ang takna, magsangka usab ang Southwestern University-Phinma Cobras ug ang Kiboy's Computer Solution sa laing special match. (JBM)