DINHI sa kalibutan, way imposible kon ang tawo molihok ug magkugi aron makab-ot ang iyang mga pangandoy.
Ang kugi ug paningkamot sa tawo pun-an og pag-ampo sa kahitas-an, segurado nga molampos kini bisan sa mga hagit ug pagsuway sa kinabuhi.
Kon kugi ug paningkamot ang hisgutan, usa na niini si Joselo “Selo” Judaya.
Gikan sa pagpananggot, nag-bakery ug ubang klase sa trabaho, karon usa na ka developer og yuta si Selo.
Nagtukod siya og kompaniya nga gitawag og Amalia Property Ventures Corp. niadtong 2015 ug siya ang chief executive officer sa kasamtangan.
Niadtong Pebrero 8, 2020, gisaulog sa maong kompaniya ang ika-5 nga anibersaryo sa Maayo Hotel, dakbayan sa Mandaue. Ang party nga may tema nga Shimmering silver, gitambungan og 200 ka mga bisita ug mga empleyado sa kompaniya.
Asoy ni Selo nga di makatuo ang iyang asawa nga si Amalia, 55, nga mosud siya sa maong klase sa negusyo tungod kay naggikan sila sa kalisod.
“Kon wala ang Ginuo, wala ni ang tanan, imposible moabot ko ani. Nangutang ko, niagwanta ug nagtiyaga. Si former senator Manny Villar ang akong inspirasyon, sipag at tiyaga,” sumala ni Selo, 60 anyos na.
Gawas sa Amalia, ka-partner usab si Selo sa Atong Balay Pinuy-anan Inc. uban sa iyang higala nga si Ruel Erno.
Si Ruel maoy usa sa mga nag-agni ni Selo nga mo-invest sa maong negusyo niadtong 2008.
Isip developer, ubay-ubay na og mga proyekto ang gihawiran sa Amalia apil na ang mga subdivision.
Ang mga proyekto ni Selo naa sa mga siyudad sa Sugbo, Mandaue, Bogo ug Lapu-Lapu ingon man sa mga lungsod sa Consolacion ug Cordova; isla sa Bantayan ug Panglao, Bohol.
Moabot sa P1.2 bilyones ang gross market sa Amalia. (SCG)