USO na usab ang kaka sa Purok Lemonsito, Barangay Gun-ob, hinungdang bisan diing bahina sa maong dapit anaay magpaaway sa kaka. Adunay bihagay ug aduna poy pustahanay. Ilang gipakasama ang kaka sa manok nga itari sa buwangan o tigbakay.
Daghan ang nabuang sa maong kalingawan, ilabi na sa kabataan. Lakip sa nagumon sa naasoyng bisyo ang duha ka anak lalake nila ni Rudy-Carmen nga si Jonel ug Jekoy. Gani, halos matag gabii atua sila magyampungad sa tugkaran nila ni Jasper-Lotis sa eskina sa pribadong dalan paingon sa gipuy-an nilang Rudy-Carmen.
Drayber og dyip pasaheroan si Rudy ug tibuok adlaw siyang mokayod sa trabaho aron makahipos og igong kita nga magamit sa ilang pagpuyo ni Carmen nga anaa lang sa balay uban sa ilang duha ka liwat. Sagad gabii na kaayong mahiuli si Rudy gikang mamasada sa PUJ nga iya sa adunahang Hapon nga naminyo og Pinay sa ilang barangay.
Usa ka gabii niana naagian niya sa eskina sila si Jonel ug Jekoy nga nanulong na usab og paaway sa kaka.
“Hoy, Jonel, Jekoy, pamauli na mo kay lawom na kaayong gabii!” ni Rudy ngadto sa mga anak. “Unsa, di mo mamauli kay ako nang ipakaon ninyo ang kaka?”
Mituman ang duha kay nahadlok nga tinud-on sa ilang amahan ang bahad. Nagdinaganay sila padulong sa ila, biniyaan si Rudy.
“Sus, ning mga bataa, nabuang na gyud anang kaka,” ni Rudy sa kaugalingon dayong padayugdog lahos sa ilang balay.
Malipayon kaayo ang pagpuyo sa magtiayong Rudy-Carmen sukad sa ilang panagtipon kay managsama man silang masinabuton sa usag-usa. Apan ning bag-ohay lang nakamatikod si Rudy og kausaban sa kinaiya sa asawa. Nahanaw na ang kaparaygon niini kaniya. Gani, dili na kini moatiman kaniya sa pagpakaon kanang mahiabot siya gikan sa trabaho. Siya pa mismo ang mosukad sa pagkaon bisag lapoy ang iyang lawas sa tibuok adlaw nga pagpamasada. Pero giantos lang ni Rudy ang tanan kay mahal niya ang kapikas. Dili siya gustong magkasumpaki sila kay nahadlok siyang mag-away sila ug maungkag ang ilang pagpuyo.
Nasayran ni Rudy nga nabuang diay si Carmen sa madyong. Naa man goy madyongan sa ilang Jun-Maribel nga ilang silingan. Apan gipasagdan lang gihapon niya si Carmen aron duna usab kiniy kalingawan samtang mao rang usa sa balay.
Apan sa pagpanglabay sa mga adlaw nakabantay na pod si Rudy og laing kausaban sa lihok ni Carmen. Kanunay na kining manghindik bisan anaa ra sa balay.
“Naunsa ka god, Carmen, nga nagkampat man nang nawong nimo sa meyk-ap?”
“Ada, natural lang kini, Rudy, uy, aron di ta hibiyaan og bana!” ni Carmen.
Wala na lang motubay pa si Rudy kay naglikay siya nga magkalalis sila ni Carmen. Mitalikod siya ug miadto sa sakyanan nga iyang gipahiluna dili layo sa ilang balay aron mopadayon pagpamasahero.
Sa iyang pagpauli nianang gabhiona, human ikagrahe ang sakyanan, nakita na usab niya ang mga anak nga nagpaaway sa kaka sa eskina.
“Jonel, Jekoy, pamauli na kamo kay gabii na kaayo, O!”
“Unya na, Pa, kay tiwason una namo ni,” si Jekoy ang mitubag. “Mosunod lang mi.”
Wala na lang pugsa ni Rudy ang mga anak nga nalingaw sa paaway sa kaka ug mipaturatoy siya pauli sa ila. Apan paghitangka niya sa tugkaran nakamatikod siyag kasikas sa ilang lawak ni Carmen. Dali siyang misaka ug pagtukas niya sa kuwarto, misugat sa iyang panan-aw ang hubo nga lawas sa asawa ug sa lalake nga daling miambak sa bentana bitbit ang mga sapot nga wala pa ikasul-ob. (Katapusan)