TAAS na kaayo ang presyo sa petroleum products karong panahuna. Kon moubos, gamay ra og tidlom, apan kon mosaka, doblehon. Mao nga kining pagdaghan karon sa mga motorsiklo ug nag bike-to-work di na ikahibulong. Ang pagdaghan sa mga motorsiklo ug biseklita timailhan sa duha ka mga butang- nagkagrabeng kahimtang sa trapiko nga gilalisan pa sa atoang mga lider ang sulusyon ug ang ikaduha, pagmahal sa gasolina.
Husto ang director sa Land Transportation Office (LTO) nga ang habalhabal, bisan tuod kon ilegal, gipiyungan na lang nila tungod kay mao kini ang labing epektibong pampublikong transportasyon sa pagkakaron. Aron di ka ma-late sa imong trabaho, pagtungha ug uban pa, sakay og habalhabal.
Maayo unta lagi mapasar na ang balaudnon sa among representante sa Cebu City north district, Raul del Mar, nga mag-ila na sa habalhabal isip transportasyon.
Bisan tuod kon makaangkon na og maayong public transport ang nasod, ang habalhabal gamit kaayo sa kabukiran ug ubang hilit nga mga dapit. Nganong di man ilhon kining maayong panginabuhian? Panahon nang suportahan kini sa mga magbabalaud.
Biseklita
Kaniadto, nihit pa kaayo ang PUJ sa amoa sa Talamban padung sa Pit-os kon gabii na. Nahinumdom pa ko kaniadto nga nanghuwam ko sa akong ig-agaw og road bike aron mas sayon nako ang paglakawlakaw bisan gabii.
Sa 1980s ug early 90’s pait ang amoang dapit kay gawas nga layo, wa nay mobiyaheng PUJ basta lawom nang gabii. Kasagaran gikan ko sa tunghaan ug later sa trabaho, maglakaw lang ko. Kay naa man tuoy taxi nga mohatod, apan taga liog ang presyo. Fast forward karon, mag-ilog ang mga driver sa paghatod.
Kaniadto, gamit kaayo nako ang biseklita sa pagsuroysuroy bisan asa. Di pa kuyaw kay gamay rang mga sakyanan. Pipila ra man sab ang mga subdivision ug tunghaan kaniadto. Karon ang development sa Cebu City padung na sa Talamban ug sa kabukirang kasikbit niini.
Bisan pa, ang biseklita gamit gihapon kaayo.
Incentive
Niini, maayo unta nga ang kagamhanan magsugod na usab paghatag og atensyon alang sa pagsuporta sa sektor sa mga nagbiseklita. Daghan na ang mga plano, apan ang mga pulitiko kutob ra sa laway. Naa na unta tong tax incentive niadtong business establishments nga mobutang og bike racks ug uban pa.
Mas maayo gani unta nga ang mga kompaniya mismo mohatag usab og incentive sa mga kawani nga mag bike-to-work aron pagdasig sa uban nga mohimo usab niini.
Apan makaguol, daghan sa mga naa sa gobyerno ug negusyo nga nahigot ang mentalidad sa kagahapon.