Diola: Binungolay

Fr. Carmelo Diola

Binasi sa Levitico 19:1-2, 17-18; Salmo 103; 1 Taga-Corinto 3:16-23; Mateo 5:38-48

NAKASUWAY na ba mo nianang magbinungolay? Sagad magsugod lamang kini sa gamay nga butang, gamay nga bikil nga wa gyoy lami. Gani, moabot ang punto nga bisag ang rason kon nganong dili motagad sa laing tawo mahikalimtan na lamang, apan tungod kay nakigbungol na man, paandayonan na lang. Kapoy ning magbinungolay kay kanunayng maglikaylikay. Makaingon ta nga ang tuboran niini maoy ang “yawa” nga kon balihon “away” ang resulta.

Sukwahi kining kinaiya sa pagbinungolay sa pagtulon-an ni Jesus: “Higugmaa ninyo ang inyong mga kaaway, ug iampo ninyo ang mga naglutos kaninyo”. Hinuon tinuod nga kon hapdos pa ang pagbati nga samaran, di man sad tingali maayo nga makigharong dayon sa mga nakasakit kanato. Apan walay padulngan ang pagbungolay. Walay samad nga maayo niini.

Ang pag-ampo alang sa mga kaaway bulohaton aron mahimong anak nga sinagop sa “inyong Amahan nga atoa sa langit, kay ang adlaw iyang gipasubang sa mga daotan ug sa mga maayo, ug ang ulan iyang gipabuhagay sa mga matarong ug sa mga dili matarong.”

Ang paghigugma sa kaaway timailhan diay nga ang usa ka tawo naliwat sa Dios kansang gugma, nga makita diha sa kinaiyahan, walay pili. Gani mosukwahi si Jesus sa pagbinungolay: “Ug kon tagdon ninyo ang inyong mga igsoon lamang, unsa may inyong gibuhat nga labing labaw pa?” Timailhan ang paghigugma sa kaaway sa kahingpitan nga susama sa pagkahingpit sa Langitnong Amahan.

Gihisgotan kining tawag nato nga maliwat sa Dios diha sa libro sa Levitico: “Pagpabalaan kamo, kay Ako, ang Ginoo, inyong Dios, balaan.” Nagmando pod ang Dios nga dili kita magbaton og pagdumot sa atong isigkatawo, bisan pag matag karon ug unya kinahanglan nato silang korehian. Sa laing bahin, nagsuwat pod si Pablo mahitungod sa tumutuo nga templo sa Dios. Ang tawag sa pagkabalaan bunga ug hagit sa pagkabinunyagan.

Kon tinuoray diay ang atong pagkakristohanon, maninguha kita nga higugmaon ang atong mga kaaway. Kon wala ang maong paninguha, mini ang atong pagkamagtutuo. Matngoni nga migamit ta sa pulong “maninguha” kay lisod baya kaayo kini ug dili madalidali. Ang unang lakang mao ang pag-ampo sa atong mga kaaway, sa mga tawo nga nakapasakit kanato ug atong napasakitan.

Giampo na ba nato ang atong mga kaaway?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph