Mongaya: Tawo ni Duterte si Bato

NAANDANG atik sa mga senador nga kining ilang mga baruganan alang sa kaayuhan sa katawhan. Apan, lahi si Senador Bato dela Rosa nga sobra ka prangka. Niangkon si Bato nga loyal siya kang Presidente Rodrigo Duterte.

Loyal siya ni Presidente Duterte niining isyu kabahin sa prangkisa sa ABS-CBN. Para kang Bato, ang presidente nagrepresent sa katawhan busa ngadto siya loyal.

Ang problema lang sa maong baruganan kay daghan baya sab ang di uyon nga pasirad-an ang ABS-CBN basi sa kagustohan sa presidente.

Alang kanako, mabaw ra kaayo ang hinungdan nga pasirad-an ang ABS-CBN tungod kay wala kini mopasundayag og usa ka political ad kaniadtong 2016.

Silotan ang maong network tungod sa maong kalapasan. Apan pasirad-an?

Dayon, moingon pa si Senador Bato nga unsa kining 11,000 nga mawad-an og trabaho kon itandi sa katawhang Pilipino?

Kon 16 milyones ang nibotar ni Presidente Duterte sa 2016, nagpasabot ba nga uyon kaniya ang katawhan Pilipino sa isyu sa ABS-CBN karon?

Makapabalaka kining mga rason nga ihatag ni Senador Bato kay moguwa man gud nga wala siyay kaugalingong baruganan sa mga isyu. Alang kanako, mahimong modapig gyud siya kang Presidente Duterte apan pinuhon sab niya iyang mga rason oi.

VFA

Moinsister si Presidente Duterte nga kining iyang pagwagtang sa Visiting Forces Agreement (VFA) tali sa Pilipinas ug sa Amerika bunga sa pagduso og independente nga foreign policy. Alang kanako, nindot kaayo nga rason.

Ang nakaapan lang kay grabi man sab kini siyang nakighigala sa sa China. Gani, wala may lig-ong lakang ang administrasyon kabahin sa pag-ilog sa China sa atong mga isla diha sa Spratley’s ug ang pagbabag sa atong mga mangingisda sa pagpangisda diha sa Panatag Shoal kun Scarborough Shoal.

Hinuon, dako sab nga pangutana kon epektibo ba sab ang VFA batok niining maong mga kalapasan sa mga Insek sa atong soberanya?

Ingon man, laing pangutana kon makasukol ba kita sa China kon wala na ang Amerika.

MASUKO

Dakong risgo ang gibuhat karon ni Presidente Duterte kay bisan pa og bale wala kintahay ni Presidente Donald Trump ang pagwagtang sa VFA, dako ang kasuko sa Amerika niini.

Di kaha kini makapatukmod sa Amerika nga mas mosuporta hinuon sa mga lakang nga mawala si Presidente Duterte sa Malakanyang?

Hinuon, lig-on man nga anaa kang Duterte ang kadagkuan sa military. @anol_cebu sa Twitter

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph