Nalzaro: Bibliya itudlo sa eskuwelahan

KON si Manila sixth district Congressman Bienvenido ‘Benny’ Abante maoy pabut-on, ipatudlo niya ang Bibliya sa mga tunghaan kon i-apil isip subject alang sa mga tinun-an sa elementary ug high school sa mga public school. Matod pa ni Kong. Abante, kinsa usa ka pastor sa usa ka born again church, nga ang pag-apil sa pagtudlo sa Bibliya makahatag og giya sa kabataan ug malamdagan ang ilang mga huna-huna kabahin sa bug-os nga pagtuo sa Labaw’ng Makagagahum.

Ang balaudnon ni Abante nga pagatawgon og ‘Mandatory Bible Reading Act of 2019’, matod pa, makapalambo sa kahimtang ug panginabuhi sa katawhan labi pa sa mga kabataan. Ang Estado mi-ila sa papel sa kabataan alang sa nation-building. Pagtudlo sa mga kabataan sa insaktong obligasyon isip usa ka Filipino citizen, pagpa-lig-on sa maayong pamatasan ug espirituwal ingon moral nga karakter og pagdisiplina.

Si Abante, kinsa usa ka pastor sa Metropolitan Bible Baptist Eklesia, usa ka born again group, nagkanayon nga dako kaayo og ikatabang sa pag-giya sa kabataan ngadto sa pagsubay sa insaktong dalan ug maduol sila sa Ginoo kon itudlo ang Bibliya. Apan ang dakong pangutana kon unsa man ang mamahimong implikasyon sa ubang mga relihiyon niini? Hinuon, anaa sa maong balaod nga ang mga Muslim tudluan usab kabahin sa Quran (tumbas sa bibliya sa Islam).

Dawaton ug sagupon ba kaha kini sa mga tinun-an nga lain og tinuhuan? Niadtong elementary pa ko, aduna man kami subject sa relihiyon o catechism kausa sa usa ka semana. Kabahin kadtong among subject sa Katoliko lamang. Mi-protesta ang uban nakong mga classmates nga lain og tinuhuan kay sukwahi man sila og tinuhuan. Karon, dili pod kaha mo-protesta ang laing tinuhuan? Bisan og pareho kita og Bibliya nga gitamdan, apan lahi-lahi baya ang atong interpretasyon sa Bibliya base ug pinasibo sa atong tinuhuan. Dili kaha ni mahimong debate? Kinsa man pod ang motudlo? Gikan sa Simbahang Katoliko? Unya mosugot ang lain og mga tinuhuan? (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph