Editoryal: Di pasagdan

Editorial Cartoon by Josua Cabrera
Editorial Cartoon by Josua Cabrera

NAGPADAYON sa pagtuon ug pag-umol og mga plano ang mga local government unit (LGU) kon unsaon nila sa pagtuman ang mando sa Department of the Interior and Local Government sa paghawan sa highway sa mga pedicab ug traysikol.

Tumong niini mao ang paghawan sa mga highway gikan sa mao nga mga sakyanan nga naghatag og problema sa dagan sa trapiko. Gibasol ang mga traysikol sa paghuot sa mga sakyanan sa mga dapit nga naa kini.

Di unta tingali maglisod ang mga LGU sa pagpatuman niini kon niadto pa lang gituman na ang memorandum circular sa 2007 pa nga nag-ban sa mga pedicab ug traysikol sa mga highway. Gitugtan lang ang mao nga mga matang sa sakyanan nga makaagi sa highway kon way mga pasaheroang sakyanan nga nagdagan.

Apan karong panahuna, tanang highways duna nay mga PUJ nga nagdagan. Gikan sa Carcar sa south ngadto sa Danao City sa north, naa nay mga rota sa PUJ. Wa pa ni labot sa nagkadaghan nga mga bus sa kalungsoran.

Tungod sa pulitikanhong pwersa sa mga organisasyon sa traysikol ug pedicab, gipiyungan kini sa mga LGU. Karon, lisod nang piyungan tungod kay nangusog na ang DILG. Kon di motuman ang local chief executives, sila ang maproblema kay maoy masilutan. Apil sa masilutan ang mga barangay kapitan.

Kon ipatuman kini karon, angay nga mosabot ang mga drayber ug operator sa mga traysikol kay ang kahimtang sa mga karsada karon ug kaniadto lahi na. Grabe na kahuot ang trapiko ug ang hinay nga pag-irog nakapasamot sa problema.

Gawas nga pangitaan og mga rota ang mga traysikol, panahon nang dunay mga pagtuon nga ipahigayon kon unsaon sa pagtabang kanila sa ilang panginabuhian kay seguradong mogamay ug malimitahan ang ilang income. Duna baya ni silay mga pamilyang gisuportahan ug way laing gisaligan, ang pagpamasahero ra.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph