Saludo kami: Talento sa pagdibuho

(Hulagway gikan James Abayon Lolo Facebook page)
(Hulagway gikan James Abayon Lolo Facebook page)

TUNGOD sa social media nadiskubrehan ang talento sa usa ka Dabawenyo.

Ang Dabawenyo artist nga si James Abayon Lolo, 20, migamit sa social media aron makadani og atraksiyon sa iyang self-styled art – ballpoint freehand sketch.

Ang taga-Maco, Davao de Oro nga si Lolo sa pakighinabi sa SunStar Davao nagkanayon nga grabeng kalipay ang iyang gibati human nga nag-viral ang gihimo niyang sketch sa inilang artist, Vincent van Gogh gamit ang iyang Titus pen.

Gi-upload niya ang iyang sketch, Pebrero 10 ug as of Pebrero 21 ang post mihakot na sa sobra 17,000 ka reaksiyon ug 16,000 shares.

Ang iyang obra na-feature na sab sa nagkadaiyang art pages rason nga nakahabig sab og internasyunal nga atensiyon ang iyang gihimo.

Saysay ni Lolo nga wala siya magdahum nga daghan ang mobilib sa iyang gihimo.

Niya, ang iyang gihimo resulta lang sa pagpalabay niya og oras sa tunghaan.

Angkon hinuon niya nga idolo niya si van Gogh, mao nga kini ang gihimo niyang subject sa iyang simple nga pahinungod.

“Naanad naman gud ko nga mag-draw jud pag naa sa akong chair kay di ko gusto wa koy gibuhat tas na-addict sad ko sa pag-sketch kay gituman man gud nako akong motto nga draw everyday,” ni Lolo.

Gikan sa kompetisyon sa tunghaan, nakakita og laing luna si Lolo nga mapresenta niya ang iyang mga obra, ug kini ang social media.

Si Lolo, second-year college student sa University of Southeastern Philippines (Usep), nangandoy nga mokuha og kursong may relasyon sa artes, apan tungod sa pinansiyal nga suliran wa niya kini mahimo.

Sa kasamtangan nagtungha siya sa kursong Bachelor of Technical Vocational Teacher Education (BTVTED).

Apan wa kini makapugong kaniya nga ipadayon ang maong damgo.

Ni Lolo, dihang sais-anyos pa siya gihatagan siya og krayola sa iyang inahan.

“Nabantayan ni mama nga tanang makita nako akoang gina-memorize tapos pag abot sa balay akong gina-draw. Then at the age of 7 gipalitan ko niyag drawing book and art materials. Tapos nag-drawing ko nga wala juy gatudlo.”

Sa iyang talento, misalmot siya sa lainlaing poster-making contest sa tunghaan ug national competition.

“I believe nga do what you love and love what you do. Di nimo mahibaw-an nga na-achieve na diay nimo imong gusto ma-achieve. Tapos i-accept tanang mistakes because mistakes are portals of new discoveries.”

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph