BANSALAN, Davao del Sur -- Daling miresponde ang kapulisan human nakadawat og impormasyon nga adunay lalaking nagdala-dala og mahait nga hinagiban samtang didto sa usa ka videokehan sa Purok Dos, Barangay Dolo, alas 9:58 sa gabii, Biyernes, Pebrero 21.
Si Major Peter Glenn Ipong, hepe sa Bansalan Municipal Police Station nagbutyag nga sa ilang pagresponde sa lugar, nailhan ang suspek nga mao si Reymart Villar, 21, ulitawo ug usa ka sound system operator sa Barangay Poblacion.
Matud ni Ipong nga nakuha sa posisyon sa suspek ang usa ka kutsilyo nga adunay 12-pulgadang gitas-on.
Nasayran nga naalarma ang mga anaa sa videokehan human nasiplatan ang suspek hinungdan nga dali silang nangayo og tabang sa mga awtoridad.
Gisusi pa sa kapulisan kon unsay motibo sa suspek sa pagdala og makamatay nga hinagiban.
Human giaresto, gilayong gipadlak sa ilang selda ang suspek ug gihikay ang tukmang kaso nga ipasaka batok kaniya.
Samtang nagpasalamat si Ipong sa mga molupyo nga paspas nagpaabot og mga impormasyon kanila ilabi na sa mga tawong katingad-an ang lihok aron nga maipalawom gilayon sa beripikasyon. (Orlando B. Dinoy)