Kanhi beauty pageant candidate gidakop

GIDAKOP sa mga sakop sa City Investigation Detection Management Branch sa Cebu City Police Office ang usa ka 34 anyos nga kanhi kandidata sa usa ka beauty pageant pinasikad sa warrant of arrest nga giisyu sa korte sa kaso nga cyber libel.

Si Police Lt. Col. Frankie Jingle Lugo, pangu sa CIDMB, maoy nangu sa pagdakop kang Angeline Cebuco, 34, kanhi kandidata sa Mrs. Cebu 2019, taga Villa Fatima Village, Barangay Guadalupe, Siyudad sa Sugbo.

Gidakop si Cebuco pasado alas 6 Biyernes sa gabii pinaagi sa pag-serve sa warrant of arrest nga gi isyu ni Judge Ramon Daomilas sa Branch 11 sa Regional Trial Court (RTC) sa kaso nga kalapasan sa Cybercrime Prevention Act of 2012.

Gimanduan si Cebuco sa korte sa pagbayad og P10,000 isip piyansa alang sa iyang temporaryong kagawasan.

Mga alas 10 sa Sabado sa buntag, Pebrero 22, nipiyansa si Cebuco.

Kuhaan unta siya sa iyang habig, apan wa na siya maabti sa Superbalita Cebu.

Matod sa reklamanteng di gustong nganlan, iyang gikiha si Cebuco tungod sa mga post niini sa Facebook nga nibastos kaniya.

Wa na siya mohatag pag dugang mga detalye kay gidid-an siya sa korte.

Ang mga kaso sa cyber libel nagkadaghan tungod sa grabeng gamit karon sa social media, labina sa Facebook.

Mga pulis mitambag sa mga netizen nga di magpataka og post karong panahuna aron di mapasakaan sa mao nga kaso nga mopadaku sa problema. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph