ANG 900 nga baboy sulod sa lima ka mga purok sa Barangay Inayangan, Calinan District, Davao City pangpatyon sugod sa Dominggo, Pebrero 23, pipila ka adlaw human makuha ang mga samples gikan sa mga patay nga baboy nakompirma nga nataptan sa African Swine Fever (ASF).
Si Noel Provido, ang Department of Agriculture(DA)-Davao Region Regional Agriculture and Fisheries Information Section chief, nagsulti sa paghinabi sa telepono Sabado, Pebrero 22, nga ang prosesong pagpatay moepekto na human ang 19th City Council nitugot sa rekomendasyon sa Davao City Disaster Risk Reduction and Management Council (DCDRRMC) nga ideklara ang lugar ubos sa state of calamity.
Gisulti ni Provido nga ang pagpatay sa mga baboy gikinahanglan aron nga mapugngan ang pagkatap sa ASF, kon diin hangtud ning pagsuwat wala pa gyuy kaayohan.
Si City Veterinarian’s Office (CVO) head Cerelyn Pinili sa paghinabi niadtong Biyernes, Pebrero 21, nga ang pagpatay mahitabo sab gilayon, sa pakig-alayon sa DA ug uban sa nagpakabana nga mga ahensiya.
Matud ni Pinili nga kapin 90 ka tigpamuhi og baboy bayran sa dakbayan ug DA, isip hulip sa depopulated nga mga baboy.
Giklaro niya nga mohatag sila og pinansiyal nga tabang ngadto sa mga tigbaboyan pinaagi sa “culling” nga tag-P1,500 matag baktin, ug P5,000 matag grower o P90 matag kilo, kon asa ang mas taas, matag grower. Kini kuhaon gikan sa P32,295,200 nga pinansiyal nga tabang nga gitugot sa Konseho, base hangyo sa City Mayor’s Office.
Wa pay labot ang P5,000 nga bayad nga ihatag sa Department of Agriculture-Davao sa matag baboy nga patyon.
Gibutyag ni Provido nga ila nang gitrabaho karon ang pinansiyal nga tabang nga ihatag sa mga namuhi og baboy sa Inayangan.
Nasayran nga ang Inayangan atbang lang sa Barangay Lamanan kon diin nahitabo ang unang ASF outbreak sa dakbayan nga gideklara sayo ning bulana. Apil nga naapektuhan mao ang Barangay Dominga. Ang nahisgutang duha ka barangay pulos naa sa Calinan District.
Sa nahisgutang duha ka barangay, moabot sab sa kapin 2,000 ka mga baboy ang gipamatay.
Sa kasamtangan, mga naapektuhan nga barangay nalakip ubos sa sa quarantine zone o usa-kilometros nga radius sa “1-7-10 Protocol” nga giimposar sa Department of Agriculture (DA).
Gisulti ni Provido nga wala pa hinuon sila makapahaum sa “ground zero” coverage sa usa ka kilometro nga radius, tungod kay ang Inayangan apil sa maong radius, kon diin ubos sa quarantine zone.
“Same pa lang gihapon to atong gi-impose tungod wala pa man tay formal nga adjustment,” tin-aw niya.
“Zones should be adjusted in the infected premises or reference point,” dugang pa niya.
Matud sa opisyal ang siyudad ug ang DA nakig-istorya na sa mga naapektuhan nga mga hog raisers.
Dugang pa niya nga ila nang nasabtan ang kahimtang, ug uyon sila nga itahan ang ilang mga baboy isip pamaagi aron nga mapugngan ang pagkatap sa kagaw sa kasikbit nga mga barangay.
“Open na sila sa panghitabo kay nakita naman nila unsa ang nahitabo sa Dominga ug Lamanan,” tin-aw ni Provido.
Sa pagkakaron, wala pa sila makadawat og bisan unsang gidudahan nga baboy nga naa sa protocol zones, apan hugot silang gi-monitor.