20K ka face masks nadawat sa Cebu City

ANG Cebu City Government nakadawat og 20,500 ka mga face mask gikan sa Philippine Chee Kung Tong Chinese Free Mason Inc. (PCKTCFMI)para ihatag sa mga Sugbuanon nga nanginahanglan, hilabi na ning hulga sa corona virus disease (COVID-19).

Si Mayor Edgardo Labella nidawat sa donasyon nga gitunol sa Philippine Chinese Chamber of Commerce and Industry, Inc. Cebu Chapter ug Cebu XinHua Chamber of Commerce, Inc. nga maoy katambayayong PCKTCFMI.

Si Labella nagkanayon nga ang mga face mask iyang itugyan ngadto sa Cebu City Health Department ug Cebu City Medical Center.

Sila na ang moapud-apod ngadto sa mga tawo nga nanginahanglan.

Ang mga maskara mao ang gamiton para sa proteksyon sa mga sakit nga motakboy, hilabi na sa gikahadlokan nga COVID 19.

Human nagpositibo ang tulo ka mga Chinese national nga niagi sa Sugbo, nagnihit sa supply ang face masks.

Si Labella nagkanayon nga ang maong mga face mask iyang ihatag ngadto sa mga barangay nga mopadangat og request ngadto sa CHD.

Ang mayor niingon usab nga iyang hatagan og 1,000 ka face masks ang barangay Taptap diin nahimutang ang quarantine facility sa Dakbayan kon pananglit adunay person under investigation (PUI) sa COVID 19.

Gawas niini, si Labella nipahibawo nga ang City Government manghatag usab og hand sanitizer nga maoy ihugas sa kamot kon way tubig ug sabon sanglit ang COVID motakboy usab pinaagi sa hand contact. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph