620 ka sakyanan mibabag sa dan

ADUNAY 620 ka mga sakyanan ang gikuha sa Traffic Enforcement Agency of Mandaue (Team) gikan sa dan atol sa clearing operation sa mga dalan sa barangay isip pagtuman sa mando sa Department of the Interior and Local Government (DILG).

Adunay 545 ka mga sakyanan ang na-isyuhan og ticket sa kalapasan tungod sa illegal parking ug 75 ka mga sakyanan na-clamp kaniadtong Enero.

Si Arnold Malig-on, hepe sa operasyon sa Team, nagkanayon nga kadaghanan sa mga nagbabag nga mga sakyanan sa kadalanan sa barangay gikan sa mga residente nga way igo nga parkinganan ug mga delivery vehicle sa mga bodega.

Sigon ni Malig-on nga human sa ilang pagpang-clamp, sunod adlaw mamalik na sab kini hinungdan nga maglisod sila sa pagpahawan sa dalan.

Ang mga nakalapas isyuhan og citation ticket ug kinahanglan nga mobayad og multa nga P500 alang sa traffic violation ug dugang multa alang sa illegal parking.

Lakip sa mga nahawan sa Team mao ang mga tricycle nga gihimo ang dalan og terminal.

Sigon ni Malig-on nga di lang kini nila mahawan, masuta usab nila kon kinsa sa mga drayber ang wa naka-renew sa ilang franchise.

Gidayeg usab sa Malig-on ang mga barangay nga nakig-alayon nila, labi na sa mga barangay nga maoy manguna sa clearing operation sa ilang mga dapit.

“Ubang barangay sila mismo ang mo-lead. Ang amo na lang ang pagkuha sa mga sakyanan gamit ang among mga equipment. Ingon ana gyud unta,” ingon Malig-on

Giawhag niya ang pipila ka mga barangay nga mangu sa ilang clearing operation ug makigtambayayong sa Team ug sa Mandaue City Legal Enforcement Unit.

“Hinaut nga human sa among clearing operation, ang mga barangay maka maintain,” ingon ni Malig-on.

Sa bag-o nga datos sa MCLEU ug Team, sumala ni Malig-on nga 85 porsyento sa national highway nga nahawan samtang ang mga dalan sa barangay anaa pa sa 65 hangtod 75 porsyento ang na-clear .

Ang 75 ka adlaw nga clearing operation sa mga dalan sa barangay direktiba gikan sa DILG, subay sa mando ni Presidente Rodrigo Duterte nga limpyohan ang mga dalan sa bisan unsang mga babag.

Kinahanglan sundon sa mga barangay kapitan sa di pa ang Abril 30, 2020.

Kon di kini makatuman sa maong direktiba, mamahimong mapasakaan og kaso ang mga local chief executives.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph