BHW 6 ka buwan way sweldo

DUL-AN sa 100 ka mga Barangay Health Workers (BHW) gikan sa 17 ka mga barangay sa Sugbo nagpanon sa Barangay Apas gym sa Sabado, Pebrero 22, aron pagpangayo og tabang nga makuha ang ilang honorarium gikan sa City Health Department (CHD).

Ang mga BHW nagrepresentar sa mga barangay Agsungot, Apas, Inayawan, Lusaran, Labangon, Lahug, Bonbon, Buot, Kamputhaw, Pit-os, Punta Princesa, T. Padilla, Talamban, Tejero, Sapangdaku, Careta ug Calamba.

Matod ni Cherlien Monte, pangulo sa mga BHW sa dakbayan sa Sugbo, wa pa gihatag sa CHO ang ilang honorarium sulod sa unom ka buwan tungod kay giingong wa sila makatuman sa requirements, sama sa profiling.

“Wala daw kuno mi naka comply sa among requirements, specially gyud kuno sa among profiling. Mao na ilang gipasikaran karon nga wala namo nakuha ang target nga ilang gusto,” sigon ni Monte.

Giingon nga ang CHD nag require kanila nga maka comply sa 100% nga profiling sa tanang populasyon sa barangay.

“Ang pag compute nila sa profiling kay per profiling sheets ug wala gibase sa populasyon sa barangay. Since nag compute man sila sa populasyon sa barangay, dapat mo compute sad sila sa populasyon nga nasulod kada profiling sheet,” dugang ni Monte.

“Profiling sheet gyud ilang gipangita sa amoa. Og nganong profiling sheets man ilahang gipangita nga dili man mi nila sugtan nga mag field kay naa naman mi boundary between sa City Health Workers (CHW) ug ang BHW,” suma ni Monte.

Giingong nakigtagbo ang CHD sa mga BHW ug CHW niadtong Agusto 2019 para ipahibawo ang bag-ong mga katungdanan.

Suma ni Monte nga ang BHW dili na pwede mogawas sa barangay health center.

Ang CHW dili sab pwede mosulod sa barangay health centers ug dapat mag focus sa field.

Mituman

Si Mira Lyn Castillo, vice president sa mga BHW sa dakbayan sa Sugbo, sa iyang bahin, niingon nga nag comply na sila og profiling sa Hunyo 10, 2019 sa CHD.

Sigon ni Castillo nga gikara-kara ug gikuti-kuti sila tungod kay nangayo nasab kini niadtong Enero 6, 2020 og profiling sa mga buwan sa Hulyo hangtod Disyembre gamit ang bag-ong profiling sheet nga gikan sa CHD.

Tungod kay ang gamit nila sa una ang profiling sheet sa Department of Health (DOH), nagkara-kara sila pagbalhin sa ilang mga data para maka comply sa deadline sa Enero 10 ug nanghinaot nga makadawat na sa honorarium.

“Ang pangutana nganong nangayo na sab sila og profiling sa buwan sa Hulyo hantod sa Disyembre? Dapat ang kayuon nalang nila kay ang updates kon pila ang nadungag sa populasyon sama kon naay manganak,” suma ni Castillo.

Matod nila nga sa miaging administrasyon, daily time record (DTR) ug accomplishment reports ra ang i-comply para makadawat sa honorarium.

Gani, nahibong sila nganong di ihatag ilang honorarium nga nipirma naman si Cebu City Mayor Edgardo Labella sa lista sa gi-appoint nga mga BHW sa Hunyo 2019.

Ang pirma ni Labella maoy naghatag kanila og awtoridad sa pagserbisyo sa ilang tagsatagsa ka mga health center sa barangay alang sa unom ka mga buwan sugod kaniadtong Hulyo hangtod Disyembre.

Mireklamo

Gani, nipasaka og reklamo batok sa CHD ang mga BHW sa Department of the Interior and Local Government (DILG) niadtong Pebrero 17 ug sa Ombudsman niadtong Pebrero 14, 2020.

Ang panagtapok sa mga BHW gitambongan sab nila ni Cebu City Rep. Raul del Mar (north district), Pit-os Barangay Captain Nilo Tariman, Bonbon Barangay Councilor Claudia Cabriana, Apas Barangay Councilor Allan Ybanez, T. Padilla Barangay Councilor Ricardo Ledesma, ug Labangon Barangay Captain Vic Buendia.

Matud ni del Mar, dugay ra unta nga nireklamo ang mga BHW sa CHD para masulbad kini dayon.

Si Labella, sa iyang bahin, niingon nga iyang nang gimandoan si City Health Officer Dr. Daisy Villa ug City Administrator nga ihatag dayon ang honorarium kon kanus-a motuman ang mga health worker sa barangay.

Gipasaligan niya ang mga BHW, bisan pa, makadawat sila sa ilang honorarium kon mahuman ang ilang mga kinahanglanon. Si Villa, sa laing interview, niingon nga tubagon niya ang mga reklamo sa mga BHW sa husto nga forum nga naa sa Office of the Ombudsman. Nagdumili usab siya paghatag dugang mga pamahayag sa isyu. (Mae Fhel Gom-os,USJ-R Cmmunication Intern/JJL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph