NAHAROS pagdaog sa Kiboy’s Computer Solutions (KCS) ang ilang mga tahas sa elimination round human nila gipanglampornas ang Athalia One on One, 113-96, sa Mayor Edgardo C. Labella 1st Charter Cup Basketball Tournament niadtong Pebrero 22, 2020 sa Cebu City Sports Institute sa Sawang Calero ning dakbayan.
Human sa sikit nga kombati sa 1st half, ang KCS kalit lang nagbangis sa opensa sa 3rd quarter aron pagposte og 88-70 nga labaw.
Sa 3rd quarter, ningdominar ang KCS sa hinakutay og puntos, 44-24.
Si University of the Visayas (UV) standout Froilan Maglasang mao ang nangulo sa paghaguros sa opensa sa KCS diin mirehistro siya og 21 puntos.
Sa kadaugan, hingpit nga naangkon sa KCS ang numero unong puwesto dala ang 5-0 nga rekord.
Ang Athalia ninghuman sa torneyo nga adunay 1-4 nga rekord.
Sa laing bahin, naangkon sa ARQ Builders-KSB Glass ang ikaduhang puwesto human nila gipangmakmak ang Fighter 50, 96-80.
Ang ARQ Builders ningsaka sa 4-1 nga rekord samtang ang Fighter 50 ningkanaog sa 3-2 nga rekord.
Sa lain pang kombati, gipangbuntog sa ASPA ang LM Paragsa, 113-103.
Sama sa Fighter 50, ang ASPA ninghuman sab sa elimination round nga adunay 2-3 nga rekord.
Mingdaog sa simple tie-break ang Fighter 50 hinungdan nga naangkon nila ang ikatulong dapit unya ningdakin-as sa ikaupat ang ASPA.
Ang LM Paragsa nanamilit sa torneyo kauban ang Athalia. (JNP, ESL)