KAPIN sa 200 ka mga magduduwa ang ningsalmot sa Opon Basketball Association (OBA) 2020 Drafting niadtong Biyernes sa gabii, Pebrero 21 sa dakbayan sa Lapu-Lapu.
Ang mga magduduwa, nga gibahin sa 35-above ug 45-above categories, mao ang pilian sa managers gikan sa 15 ka partisipanteng teams.
“So far, aduna ta’y 211 ka players. Kada team, gitagaan nato og 15 ka mga tawo kay barangayan man ta,” asoy sa founder sa OBA nga si Lapu-Lapu City Councilor Rico Amores.
Tungod kay sagol ang duha ka age bracket sa usa ka team, gibahin sa liga ang pag-draft sa mga magduduwa diin usa ra ka kategorya sa edad ang pilion matag round.
Usa sa mga hinungdan nganong daghan ang ningsalmot sa maong kalihukan tungod kay libre ang rehistrasyon niini ug ang liga na usab ang bahala sa uniporme sa mga magduduwa.
Gawas sa pag-promote sa healthy lifestyle, matod ni Amores nga usa sa mga tumong sa liga mao ang ipalayo ang katawhan sa ilegal nga drugas pinaagi sa paugnat sa kusog.
Nipakita og suporta ang lokal nga kagamhanan sa dakbayan pinaagi sa pagtambong nila ni Mayor Junard “Ahong” Chan ug Konsehal Jan Vincent Dela Serna.
“Rest assured that the City Government of Lapu-Lapu will always support your activities. Naghinaot ako nga magmalampuson ang atong duwa karong tuiga,” saysay ni Chan.
Ang liga, nga nagpatong na sa ika-15 niini nga katuigan, nakatakdang mosugod karong Marso 7.
Natukod ang OBA niadtong 2005 sa pagpangulo ni Amores ug co-founder niini nga si Dongkoy Napisa. (NDT)