NAPAKYAS si Filipino Jeo “Santino” Santisima sa pag-ilog sa korona ni World Boxing Organization (WBO) super bantamweight champion Mexican Emanuel Navarrete kagahapon sa undercard sa Wilder-Fury heavyweight title fight sa MGM Grand Garden sa Las Vegas, USA.
Ang 23 anyos nga ALA fighter nasugamak sa 11th round TKO nga kapildihan batok sa mas taas og kasinatian nga si Navarrete, kinsa malampusong nakadepensa sa iyang korona sulod na sa lima ka mga higayon.
Nalupig man tuod si Santisima apan iyang napamatud-an nga aduna siya’y dakong potensyal hilabi na sa 4th round diin iyang napabarag si Navarrete sa 4th round.
Gipasabot ni ALA head trainer Edito Villamor nga bisan napilde si Santisima, malipayon gihapon si ALA Promotions president Michael Aldeguer sa gipakita sa lumad nga taga Masbate nga boksidor.
“Nalipay man si sir Mike sa gipakita ni Jeo. He is truly a warrior. Naa siya’y tools to become a world champion. Nagtuo gyud mi nga ma-world champion si Jeo someday,” matod ni Villamor sa pagpakighinabi ning mantalaan sa Facebook messenger.
Sa 10th round, sunodsunod nga mga kumbinasyon ang gibuhian ni Navarrete nga tatawng nagpatay-og sa kalibutan ni Santisima, kinsa nakasugakod sa maong round pinaagi sa pagdagandagan ug paggakos kang Navarrete.
Sa 11th round, naulian si Santisima ug nakapasulod kini’g makusog nga body punches nga nagpaatras kang Navarrete.
Apan adunay higayon sa 11th round nga nataymingan sa piktos nga kumo ni Navarrete ang wa nga mata ni Santisima ug niadtong higayuna, ang tuo na lang nga mata ni Santisima ang makakita.
“Dili na makakita ang akong usa ka mata maong wala na ko maka-counter,” matod ni Santisima.
Gipahimuslan ni Navarrete ang maong kahigayunan ug nagpauwan kini’g sunodsunod nga mga kumo hangtod nga giundang na sa referee ang away sa ika-2:40 minutos sa 11th round.
Alang kang Santisima, kining maong kapakyasan gamiton niyang usa ka dakong hagit aron mas mokayod pa siya’g maayo.
Si Navarrete misaka sa 31-1, 27KOs nga rekord samtang nahagbong si Santisima sa 19-3, 16KOs nga baraha.
Sa main event, gikulata og insakto ni Tyson Fury si Deontay Wilder sa ilang rematch hangtod nga milabay na og puti nga tualya ang kampo ni Wilder sa ika-1:39 minutos sa 7th round.
Sa kadaugan, naangkon ni Fury ang World Boxing Council (WBC) heavyweight title.
Si Fury nakapuntos og knockdowns sa ikatulo ug ikalimang round una giundang sa referee ang away human miitsa og puti nga tualya ang kampo ni Wilder nga timailhan sa ilang pagsurender. (ESL)