NANGALAP na og daghang mga supporters ang ABS-CBN sa katawhang Filipino nga unta dili masirad-an ang ilang negosyo nga matapos karong Marso 20, 2020.
Bisan ang mga overseas Filipino workers (OFWs) sa abroad ila na nga gikombisi nga mopasibaw sa ilang paglaban sa nasampit nga giant TV network nga ma-renew ang ilang prangkisa sa sunod nga bulan.
Kung adto ka maminaw sa bahin sa mga Lopez, maka-ingon ka nga negatibo kining gobyernoha tungod kay kalaban ka, sirad-an ang imong dakong negosyo, pero kun adto ka usab maminaw sa bahin sa dumadapig ni Pangulong Rodrigo Duterte, “Dah, maayo ra nga sirad-an tungod kay one-sided ra.”
Karon ngari kita sa neutral nga panglantaw niining sensitibo nga isyu, kasagaran kanato moingon kita nga personal tungod sa gibuhat sa ABS-CBN sa milabay nga presidential elections, kinsa kandidato ang kanhi mayor sa Davao City.
Kun kamo ang pangutan-on? Makatarunganon ug may kaangayan ba ang gipakita sa ABS-CBN sa mga political ads sa milabay nga presidential elections?
Kanako, ang ABS-CBN daw naka-minos sa kandidatura ni PRRD, sanglit usa ka probinsyanong kandidato niadto, tungod kay sukad pa sa pagbangon nila sa panahon ni kanhi Presidente Cory Aquino, nagmalampuson sila sa pagdapig og mga kandidato sa pagka-presidente sa milabay'ng panahon apan malas sila karon sa panahon ni PRRD.
Daghan ang nagkomentaryo nga katungod sa mga kongresista ang pagputol o pagpadayon sa prangkisa sa ABS-CBN ug dili sa Office of the Solicitor General pinaagi sa pagpasaka og quo warranto sa Korte Suprema. Sumala pa sa mga abogado, ang quo warranto pagtuki sa mga legalidad sa ilang operasyon kun wala ba’y kalapasan ug walay gi-abuso.
Sama pananglit sa pagpanag-iya sa korporasyon ug mga langyaw nga negosyante nga gidili sa atong batakang balaod, legalidad sa mga sangang negosyo nga dili kompleto, nagsalig sa palakasan tungod kay ila ang mga nanglabay nga presidente.
Kung ang quo warranto pakyas sa iyang dokumento nga gipasaka sa Korte Suprema, walay duha-duha nga ma-renew ang franchise sa ABS-CBN apan kun may kalapasan, goodbye sa mga negosyo sa Lopez, tungod kay sagulan man og politika.
Nagpalaban sila karon sa mga empleyado nga mawad-an daw kuno og trabaho, pero, segun sa mga magsisibya nga atong nahinabi gikan sa maong network, kaniadto contractual, karon gipaagi na og agency tinuod ba kini?
Ang hayahay kadto lang mga talent contract, pero kadtong mga cameraman, ug mga yanong empleyado gamay ra'g deperensya sapli dayon ka, tinuod ba kini?
Usa ka dakong panag-ingnan ang ABS-CBN sa mga negosyo nga ingon niini, dili sagulan og politika, kay maayo lang kung ang tanang politiko nga imong dapigan maoy manglusot, pero kung dili, patay ang negosyo mo-susama sa ilang pag-under estimate sa kandidatura ni PRRD niadto, o unsa naman karon?