MATANAO, Davao del Sur -- Hugtanong nagpasidaan ang Municipal Agriculture Office (MAO) nga di ihawon sa ilang mga balay ang mga binuhing baboy ilabi pa kun wa kini meat sanitary inspection certificate gikan sa veterinary office.
Nasayran nga tungod sa kabalaka nga motakod ang African Swine Fever (ASF) sa ilang mga baboy, pipila ka mga molupyo ang mihimo og pamaagi nga maka-ginansya pa sa ilang mga binuhing baboy, una pa man madeklarang anaa sa one-kilometer radius ug mahitabo ang depopulation kun masudlan sa kagaw.
Usa si Conching, 49-anyos nga adunay binuhing baboy sa Barangay Sinawilan, kinsa nagpaihaw sa iyang baboy ug ang karne gipautang sa tag P160 ang kilo.
Mas barato kini kun itandi sa presyo sa merkado nga anaa sa tag P180 ngadto sa P200 ang kilo ug aduna pa'y usa ka semanang lugway ang mo-ambit og karne sa baboy una bayaran.
Ang pag-diskarids sa mga opisyal sa MAO nga di magbuhi og mga baboy ning panahona maoy nakaaghat sa ubang backyard hog raisers nga ihawon na lang ang ilang baboy aron nga mapuslan pa ang kita.
Apan, sumala ni MAO officer Evelyn Cenisa, hugot nga gidili ang pag-ihaw sa mga kabalayan kun di moagi sa makuting inspeksyon.
Giawhag sab ni Cenesa ang mga nagbaboyan nga mohatag sa ilang kooperasyon aron hingusgan ang kampanya batok sa ASF nga gilaumang molungtad pa sud sa pipila ka bulan.
Samtang, gipaniguro ni Mayor Vincent Fernandez, nga luwas sa ASF ang mga baligyang baboy sa ilang merkado ug di angayang mabalaka ang publiko.
Subay sa datos nga gi-sumitir sa 33 ka barangay, adunay 1,010 ka mga hog raisers ang maong mga lugar diin anaa sa 5,420 ang populasyon sa baboy ug gipaabot pa sa MAO ang gihimong inventory sa ubang barangay.
Tungod sa ASF daghan sa mga konsumante ang di na mokaon og baboy mao nga mikunhod sab ang demand niini sa merkado.