DAVAO DE ORO -- Buot sa usa ka bana nga ipapreso ang asawa nga na-adik sa sugal nga baraha kini human nasayran nga hugtanong gipatuman karon sa Philippine National Police (PNP) ang pagdili sa mga ilegal nga pasugal sa hantak, sabong, baraha ug uban pa, nga bisan ang pagsugal sa lamay sa patay ginadili na usab.
Butyag ni Berting, 35-anyos nga usa ka panday sa usa sa mga lungsod ning probinsiya, nga nalipay siya og dako sa aksyon nga gihimo sa kapulisan sa pagtuo nga mapakgang ang bisyo sa asawa nga sumala pa na-adik sa sugal nga baraha partikular ang sugal nga tong-its ug pyat-pyat.
Saysay ni Berting, nga dugay na siyang nagpugong-pugong sa iyang kalagot, ilabi na sa ilang mga silingan nga mga sugarol nga maoy nag-agni sa iyang asawa aron nga manugal hangtod nga nahimong bisyo ug maoy kanunay nilang awayan.
Dugang ni Berting nga adunay higayon nga siya miuli gikan sa trabaho ug maoy naabtan ang mga nagtapun-og nga mga labhonon ug mga hugason nga plato sulod sa balay sanglit ang iyang asawa nga bisan og wa pa’y kaligo’g panutbras, sayo sa buntag nagsugod na’s seremonya sa sugal sa balay sa ilang silingan ug gidala ang walo ka bulan nilang masuso nga bata.
Nabalaka si Berting sanglit dili lamang mga silingang babaye ang kaatubang sa sugal sa iyang asawa kundi aduna usab mga lalaki nga kasagaran nga istambay sanglit ang mao niyang asawa makalimot na’g panapo, magpataka’g bilangkad ug magpasuso sa walo ka tuig nilang anak bisan kaatubang sa sugal ang mga lalaki.
Dugang gibutyag ni Berting nga niadtong Valentine’s Day nagsabot sila sa iyang asawa nga maglangga-langga pagkagabii, hinungdan nga miuli siya og sayo ug maoy nagluto og panihapon, naligo bisan og gihago ang lawas ug nagpahumot aron lamang humot nga motupad sa asawa, apan, nadismaya gumikan kay naabtan og kaadlawon dihang miuli ang asawa nga naglamay sa patay nga tungod sa sugal nga tong-its nalimtan ang ilang sabot.
Naghinaot si Berting nga maundang na ang bisyo sa iyang asawa apan kun dili, siya na mismo ang mopadakop ug mopapreso niini kauban sa mga silingang sugarol aron nga motagam.