NAGPADAYON karon ang konsultasyon tali sa mga lokal nga kagamhanan ug mga drayber sa tricycle ug pedicab. Kini nunot sa kamanduan sa Department of Interior and Local Government (DILG) paghawan sa mga national highway batok sa maong matang sa sakyanan.
Dugay na kining maong isyu apan karon lang nabaniog og maayo human nga gipakanaug ang maong order. Niadtong nagpuyo pa ko sa St. Jude Acres sa Barangay Bulacao, dakbayan sa Sugbo, tricycle ang bugtong masakyan kong mangumpra sa merkado sa Tabunok, Talisay City.
Gikan sa St. Jude Acres motadlas ang tricycle sa national highway padung sa ilang terminal sa Tabunok.
Sa maong terminal, nagdasok ang daghang tricycle nga mobiyahe sa nagkadaiyang rota. Niadtong panahona, tunhay pa kaayo ang biyahe agi sa highway tungod kay minos pa kaayo ang sakyanan ug maihap ang mga establisemento nga nanurok daplin sa karsada.
Sa ato pa way trapik nga masinati bisan nagdasok ang mga tricycle sa karsada. Sa paglabay sa katuigan di lang tricycle ang nagbahas-bahas sa karsada.
Niapil pagpanginabuhi ang mga drayber sa trisikad. Kini nga talan-awon imong makita bisan asa. Masiyudad o malungsod daghan sa atong kaigsuonan ang nisugal sa pagpanginabuhi sa karsada pinaagi sa pag-drive og tricycle ug trisikad.
Dili sayon kining maong matang sa panginabuhi. Ulan ug init imong antuson may madala lang bugas para sa pamilya.
Wa pa ni labot sa mga dakop nga ipatuman sa awtoridad matag karon ug unya. Pero nganong mag-antos man? Tungod kay way alternatibong kapanginabuhian.
Nganong way laing kapanginabuhian kay gipasagdan ra man sab sa gobyerno. Mailhan man lang ning maong sektor sa mga politiko panahon sa kampanya sa eleksiyon.
Dili siguro tanang LGU ang wa magtagad sa maong mga drayber, apan naglabi kadtong nipahimulos sa ilang gidaghanon sa way pagtagad sa ilang kaugmaon.
Unta to, may skills training program nga gipatuman aron haw-ason ang uban nila gikan sa karsada ug manarbaho sa mga opisina ug pabrika diin taastaas ang suholan ug benepisyo. Di kay diha ra kutob.
Tabangan sa gobyerno ang mga anak nga makaangkon og libreng edukasyon sa koliheyo. Hatagan og panginabuhian ang mga asawa.
Di ba mao ni gihisgutan ron taliwala sa kamanduan sa DILG? Di ra ba tricycle ug trisikad ang isyu karon.
Dia pa ang habalhabal ug e-bike nga angayang hatagan og seryusong pagtagad.
Kon seryoso pa ning gitutukan kaniadto han-ay na unta kaayo ang ilang kahimtang karon.
Pangutan-a tong tricycle driver kaniadto nga nakat-on og drive og taxi. Di ba diha toy kompaniya sa taxi niadtong dekada 90 nga nanawat og aplikanting drayber bisan ang nakamahuan pagdrayb ra og tricycle? Tinuod man to kay nagnihit ang drayber sa taxi.
Ang uban layo na kaayo og naabtan. Salamat sa maong kompaniya sa taxi. Ingon unta niadto ang gibuhat sa gobyerno.
Di pa hinuon uwahi ang tanan. Manghinaot ta nga kining atong gipanghisgutan maapil sa nagpadayon karon nga konsultasyon. Way mabutang sa alanganin. Magkaabot sa tunga. Gitawag kini og win-win solution kon ang mga eksperto pa ang pasultion.