SI JUAN, usa ka habal-habal driver, nangaplay sa pagka-janitor sa usa ka kompaniya sa siyudad. Mao ni ang dagan sa interview: “Pilay edad?” Tubag ni Juan, “22”. “Unsay trabaho?” “Habal-habal driver.” “Single?” “Habal-habal gani. Maayo’g tricycle, kay dunay sidecar.”
Nag-drive na lang tawon si Juan og tricycle. Ang nakaparat kay nimando ang Department of Interior and Local Government (DILG) nga hingusgan ang pagpatuman sa ban sa pag-agi sa mga tricycle sa national highways. Asa na lang agi si Juan?
Gimandoan sa DILG ang mga kagamhanang lokal sa pagrepaso sa mga ordinansa bahin sa mga tricycle, pedicab ug motorized pedicab. Gihatagan usab sila’g kutob sa hinunga-tunga sa buwan sa Marso sa pagsumitir sa ilang mga tricycle route plans (TRPs).
***
Apan daghang kalungsoran dinhi sa lalawigan sa Sugbo nga way laing kaagian, gawas lang sa national highway.
Gilantawan na kining daan sa DILG. Gihatagan og exemption kadtong mga lugar nga way alternatibong rota. Apan kinahanglan nga dunay pagtugot sa Sangguniang Bayan o Sangguniang Panglungsod.
Matod sa DILG Memorandum Circular No. 2020-004, “For safety reasons, no tricycle or pedicab should operate on national highways, whether utilized by 4-wheel vehicles greater than 4 tons and where normal speed exceed 40 KPH. However, the SP or SB may allow if there is no other alternative route taking into consideration public safety.”
***
Niawhag ang National Confederation of Tricycle Operators and Drivers Association of the Philippines (Nactodap) nga repasuhon sa DILG ang pag-ban sa tricycles sa national highways ug major roads.
Si Ariel Lim, pangulo si Nactodap, niingon nga ang Republic Act (RA) 7160, ang Local Government Code, naghatag og gahom sa mga kagamhanang lokal sa pagpasar og ordinansa nga magtugot sa tricycles nga moagi sa national highways kon way laing kaagian.
Dako sab, matod niya, ang ilang gibayran nga road users tax sa LTO kay dunay mokabat sa 1.7 ka milyon nga tricycles sa tibuok nasod. Naa man gani lane ang mga bisikleta nga way buhis-buhis?