KARONG adlawa, magsaulog ang dakbayan sa Sugbo sa Charter Day, ang adlaw sa pagka-independenti sa dakbayan.
Mga nagkalainlaing kalihukan nga naghatag og simbolo sa paghandom sa mga makasaysayanong butang ang nakahan-ay alang sa usa ka adlawng programa nga pinangulohan ni Mayor Edgar Labella ug Vice Mayor Michael Rama.
Sanglit ika-83 na karon nga kasumaran ning kasaulogan, atong daklitan sa pag-ugkit ang mga kasaysayan nga maghatag og katin-awan kon unsa gyud ang lintunganay ning maong selebrasyon.
Ang Cebu nadiskobrehan niadtong 1565 isip usa ka lungsod apan nahimo kining usa ka siyudad, pinaagi sa Commonwealth Act. No. 58, niadtong Oktubre 20, 1934. Kini gipangamahanan ni Senador Vicente Rama, kinsa nahimo usab nga ikaduhang mayor sa dakbayan.
Matod pa sa kasaysayan, nga bisan tuod og nahimo na kining siyudad sa Oktubre 1934 apan opisiyal kining gideklarar nga chartered City sa Pebrero 24, 1937.
Ang inauguration gisaksihan ni Hon. Epidio Quirino kinsa mao pa ang Interior secretary niadtong panahona ubos sa administrasyon ni Presidente Manuel L. Quezon.
Ang unang piniliay sukad sa pagkahimong dakbayan sa Sugbo napahigayon niadtong Nobiyembre, 1955 ug si Sergio Osmeña Jr. maoy nahimong mayor samtang si Ramon Duterte ang iyang bise.
Aduna man tuoy mga lain-laing bersiyon nga napatik usab sa kasaysayan, apan ang tanan nihaom sa petsa sa kasaulogan sa pagka-tsarter sa dakbayan.
Nidagan pa ang mga panid sa katuigan, nag-ilis-ilis ang mga nagdala sa renda sa pangagamhanan, apan ang di malalis sa kadaghanan mao ang kalambuan nga hangtod karon padayon natong gitagamtam. Happy Charter Day Cebu City!