ADUNAY 20 kabuok ka sakyanan ang nadakpan sa Cebu City niadtong Pebrero 20, 2020 tungod kay namasahero kini ubos sa duha ka transport network company (TNC) nga dili akreditado sa Central Visayas.
Matod ni Regional Director Eduardo Montealto Jr. sa Land Transportation Franchising and Regulatory Board (LTFRB) 7, ang ilang TNC apps nga gigamit mao ang Indriver ug Maxim.
Ang Indriver ug Maxim walay akreditasyon gikan sa Department of Transportation (DOTr) LTFRB 7, matod ni Montealto.
Sa 20 kabuok, upat niini nigamit sa Maxim app ug ang 16, ang Indriver app.
Nasikop sa taga LTFRB 7 ang 20 ka sakyanan sa Juan Luna Avenue Extension sa Cebu City ug sa Ouano Avenue sa Mandaue City.
“Wala gyud na sila mo-apply. Mo-apply man na sila sa Deparment of Transportation dayon kining mga kompaniyaha kay wala ni opisina diri sa Sugbo. Ma-download ra ni sa mga drivers ang app kay naa ra man na nag-advertise sa Facebook,” matod ni Montealto.
Nasuta nga ang maong mga app pulos natukod sa nasod sa Russia.
Matod ni Montealto, ganahan ang mga drayber nga mogamit sa Maxim ug Indriver tungod kay wala kini kuti ug wala pud nanginahanglan og requirement aron makagamit niini.
“Mao nay nakadelikado sa mga kolorum kay walay passenger insurance ang kompaniya. Ang ilang drivers ana walay training sa LTFRB. Naa man tay training sa tanang mo-drive og pampublikong sakyanan,” matod ni Montealto.
Aduna ray upat ka accredited nga TNC: Grab, MyCab, Hirna ug Hype. (JCT)