ANG Pardo Police Station sa Cebu City kada adlaw na ang pagsita sa mga barangay nga sakop niini nunot sa sagunson nga pagpamusil sukad Enero 2020.
Matod ni Pardo Police Station commander P/Maj. Jhon Kareen Escober, iyang pahugtan ang pagpatuman sa kampanya nga Oplan Bakal Sita aron mapakgang ang dautan nga tumong sa mga kriminal.
Matod ni Escober, iyang napanglantawan nga epektibo kini nga pamaagi nga maghatag og katagbawan sa publiko ug kaluwasan sa palibot.
Enero 1, 2020: Si Junrey Abapo ang gipusil patay sa Sityo Paradise, Barangay Kinasang- an. Usa ka menor de edad ang napagan.
Enero 7, 2020: Si Ariel Salandro, taga Sityo Villabuena, Barangay Kinasang-an, gipusil patay sa duha ka mga tawo sa Sityo All Season sa Barangay Cogon Pardo, samtang nanuroy og masi.
Pebrero 1, 2020: Si Thomy Abayan, 31, gipusil patay sa Barangay Sudlon 1. Paingon si Abayan sa lungsod sa Balamban, Cebu.
Pebrero 2, 2020: Si Zhoden Rey Pasa, 23, gipusil patay sa Sityo Little Hawaii, Barangay Cogon Pardo.
Pebrero 13, 2020: Si Pejay Mabaga, 31, taga Santa Ana, Manila, gipusil sa Barangay Cogon Pardo samtang nanuroy og taho.
Matod ni Escober, aduna nay mga suspek ang kapulisan. (BBT)