LAING lalake nga patay na ug adunay samad pinusilan sa iyang buko-buko ang napalgan na usab daplin sa dan sa Campo 5, Barangay Manipis, Talisay City.
Nailhan ang lalake nga si Terencio Cabahug, taga lungsod sa San Fernando, Cebu apan nag-abang sa Barangay Tabunok, Talisay City.
Nagsul-ob siya og yellow shorts ug ang iyang nawong gitaptapan og blue t-shirt.
Nakadawat ang kapulisan og tawag gikan sa mga lumolupyo alas 6:40 sa buntag sa Dominggo, Pebrero 23, nga adunay lalake nga nagbuy-od daplin sa dan.
Matod ni P/Maj. Gerard Ace Pelare, hepe sa Talisay City Police Station, nga adunay saksi sa pagpatay ni Cabahug.
Matod sa saksi, naglakaw siya sa dapit sa maong lugar alas 6:15 sa buntag ug nakakita siya og duha ka lalake sa pikas bahin sa dan nga naglalis.
Ang usa ka lalake nagsakay og motorsiklo ug ang usa nagtindog lang.
Mao nalay iyang nakita nga nibunot og armas ang lalake nga naka-motorsiklo ug nadunggan na niya ang sunod-sunod nga buto sa armas.
Nikaratil siya og dagan, matod sa saksi.
Matod sa kapulisan, si Cabahug nalambigit sa ginadiling drugas ug usa kini sa gisunod nga motibo sa krimen. Posibleng away tungod sa pagpamaligya sa shabu o drug turf ang hinungdan sa pagpatay niini.
Kay ikaduha na kini nga higayon nga adunay lalakeng gipusil patay sa maong lugar sulod sa usa ka semana, iapil na ang lugar sa pagpatrolya sa pulis ug tanod, matod ni Pelare.
“We will focus on solving these killings also. Naa na’y team to check on this,” matod ni Pelare sa Superbalita Cebu.
Niadtong Pebrero 19, 2020, usa ka lalake ang gihug gikan sa usa ka itom nga sakyanan. Ang lalake adunay daghang pinusilan sa bukobuko.
Gitaptapan ang iyang nawong og t-shirt ug walay sapot ang iyang ibabaw nga bahin sa lawas. Wala pa gihapon siya mailhi. (FMD, BBT)