PORMAL nga gipahigayon ang change of command sa bag-ong commander sa 58th Infantry Battalion nga nakabasi sa Misamis Oriental ug Camiguin.
Giinstalar isip bag-ong lider si Lieutenant Colonel Ricky Canatoy nga maoy nihulip sa duha ka tuig kapin nga pagsilbi ni Lieutenant Colonel Roy Anthony Derilo nga karon usa na ka Colonel ug nadestino sa 4th Infantry Division Headquarters.
Ang change of command gitambungan ni 4th Infantry Division Philippine Army Commander Major General Nemesio M. Gacal, kapulisan, mayores ug mga nagkalainlaing personalidad sa ahensya.
Si Canatoy niingon nga iyang ipadayon tanan nga mga nasugdan ni Derilo tungod kay sayod siya nga dili tiaw ang paningkamot niini mapahapsay lamang ang lalawigan sa Misamis Oriental ug probinsya sa Camiguin pinaagi sa istratehiya niini ug approach ilabina ang End of Local Communist Armed Conflict o (Elcac).
“Akong unang buhaton is continue lang atong campaign nga gisugdan sa atong outgoing battalion commander. Maayo ang iyang istratehiya ug iyang approach. Akong ipadayon kay epektibo man and along the way kung kinahanglan ta modugang kung unsay angayan buhaton kay very dynamic man ang atong sitwasyon ato kanang pagabuhaton. Stick to the plan and we have to do it, and 58 IB will endeavor not to fail sa among mission dinhi," matud ni Canatoy.
Padayon sab kini sa panawagan sa walhong grupo nga andam motabang ang gobyerno sa bout mobalik sa sabakan ug kini makigkoordinar lamang kanila.
"Andam mi motabang kaninyo, open hearts, under my leadership tinabangay ta. Ato ni ang Misamis Oriental, ato ang Camiguin magtinabangay ta," kini ang hangyo ni Canatoy ug paabot ngadto sa katawhan aron magpabilin nga malinawon ang tibuok lalawigan.