TULO ka mga suspetsado sa pagpamusil atol sa checkpoint niadtong Biyernes, Pebrero 21, 2020, nga miresulta sa kamatayon sa usa ka pulis ang napatay usab human giingong misukol sa lungsod sa Libertad ug Laguindingan, Misamis Oriental.
Kahinumduman nga nakabsan sa kinabuhi si Police Staff Sergeant Ronald Caayupan ug samdan ang kaubang si Police Chief Master Seargent Fernando Maestrado nga pulos sakop sa Libertad Police Station kinsa nagpahigayon og checkpoint pasado alas 8:39 sa gabii adlaw’ng Lunes sa National Highway sa Barangay Poblacion, lungsod sa Libertad, Misamis Oriental sa niaging semana.
Apan lima ka mga suspetsado nga sakay sa usa ka Mitsubishi Mirage nga adunay numero sa plaka BO J805 ang kalit lang nga namusil ngadto sa mga pulis kinsa nakasukol pa ug miresulta sa kamatayon sa usa sa suspek nga giilang si Jephone Fabriga Tinamisan, 33, taga Purok-5, Bañadero, Ozamis City human naigo ug nakabsan sab sa kinabuhi.
Mga kauban niini nangdagan ug nakasibat niadtong tungora, gibiyaan sa crime scene ang ilang namatay nga kauban, sakyanan, ug nagkalain-laing armas.
Apan nadakpan sa hot pursuit operation 6:50 sa buntag sa Pebrero 18, 2020 ang laing suspek nga giilang si Richard Manda, 31, taga Bangkal, Mahayahay, Cebu City.
Niadtong adlaw’ng Miyerkules sa nagpadayon nga operasyon, nadakpan na usab si Micky D. Abellana, 29, minyo, taga Barangay Manga, Tangub City.
Niadtong Biyernes sa buntag nagpadayon ang hot pursuit operation sa kapulisan sa Libertad Police Station uban ang lainlaing police station human duna pay laing duha ka suspetsado nga gipangita.
Basi sa ilang monitoring aminado ang kapulisan nga anaa lang kini sila nagtago-tago sa kasikbit nga dapit.
Mga alas 6:20 sa buntag ang gitumbok nga maoy lider sa grupo ang giingong misuway og sukol sa kapulisan pinaagi sa gidala-dala niini nga hand grenade ug pistola ang napusilan sa mga pulis.
Giila kining si Thomas B. Roblon, 40, usa ka security officer, sa Carmen Annex Ozamis City, Misamis Occidental.
Narekober sa posisyon niini ang usa ka fragmentation hand grenade, lima ka basiyo sa bala sa 9mm pistol, usa ka kalibre 45, ug laing usa ka M16.
Susamang adlaw pasado alas 12:30 sa udto, ang mga elemento sa Libertad Police Station ang mi-iskort sa unang duha ka mga dinakpan nga si Richard Manda ug Micky Abellana paingon unta sa Provincial Prosecutor Office aron pasakaan ang duha og kasong murder.
Apan samtang anaa sila sakay sa patrol car sa Libertad Police Station kalit nga napagngan ang maong sakyanan sa may Sinai, Laguindingan, Misamis Oriental.
Giingong nihangyo kining mga suspek nga mangihi ug niuyon sab ang kapulisan pinaagi sa pagbalhin sa ilang handcuffed sa likod apan giingong si Abellana ang nangilog og pistola sa usa ka pulis ug dihang nakabantay si Manda giingong nangilog sab kini sa pusil sa laing pulis.
Ang ubang police escort nga nakabantay sa kagubot ang deretsong namusil ngadto sa mga suspek hinungdan sa pagkaigo sa lainlaing parte sa lawas.
Si Manda ug Abellana ang gisuwayan pa og dala sa OWWA Hospital sa lungsod sa Alubijid apan pulos gideklarar nga dead on arrival sa mga doktor.
Sa pagsulat ning balita usa na lamang ka suspetsado ang pabilin nga gipangita sa kapulisan.