PATAY ang usa ka motorista human nahulog sa kanal ang gimaneho nga motorsiklo niadtong nilabay nga adlaw pasado ala 1:15 sa kaadlawon sa CM Recto Highway, Purok 7, Barangay Gusa, Siyudad sa Cagayan de Oro.
Ang biktima naila nga si Brendell Louie Jokiton, 28, kasamtangang nagpuyo sa Purok 3A, Barangay Gusa apan lumad nga taga P-7 North Poblacion, Maramag, Bukidnon kinsa nagmaneho sa pula nga Kawasaki Rauser 135 motorcycle nga dunay numero sa plaka nga 6888 KO.
Sa impormasiyon gikan sa Police Station 3 (PS3) sa Agora gikabutyag nga samtang gisubay niini ang CM Recto Highway gikan sa sentrong bahin sa siyudad paingon sa Puerto nga direksiyon, giingong nawad-an kini og kontrol sa gimanehong motorsiklo rason sa panghitabo.
Gikabutyag nga nahulog ang motorsiklo sa drainage system sa dapit hinungdan sa grabe nga naangkong samad sa nagkadaiyang parte sa kalawasan.
Dali pa kining gidala sa Oro Rescue Team sa Northern Mindanao Medical Center (NMMC) apan walay suwerteng nakabsan sa kinabuhi sa pag-abot sa tambalanan.
Ang patay nga lawas ang gi-atiman na sa nahabiling pamilya.