GIPUSIL mismo sa ulo ang usa ka babaye samtang nag-internet niadtong Pebrero 21 sa Zone 3, Basak Tangkongan, Pinikitan, Barangay Camamanan, Siyudad sa Cagayan de Oro.
Ang patay giila nga si Erlyn Casimero, 40, dunay kaipon ug residente sa maong dapit.
Sa pakighinabi kang Police Captain Ernesto Sanchez, hepe sa Police Station 2 (PS2) sa Cogon, gikabutyag nga nag-internet lang si Casimero ug giduol sa wala mailang suspetsado kinsa dul-it nga mipusil sa likod nga bahin sa ulo samtang nagtalikod.
Gibutyag ni Sanchez nga gitutokan nila ang giingong nakalalis sa biktima sa wala pa ang insidente kinsa nagbahad nga pusilon kini.
“Nasentro didto ang atong investigation,” matud ni Sanchez.
Nigawas usab sa imbestigasiyon nga giingong pagkalambigit sa ilegal nga druga nga padayon pa usab nga giimbestigahan sa kapulisan.
Dali usab nga nisibat sa sulod nga bahin sa Pinikitan, Camaman-an ang lalaki nga gasul-ob og mask ug nagtabon sa iyang ulo og itom nga sinina kinsa naka-itom og jacket.
Nakuha usab gikan sa crime scene ang fired cartridge sa giingong kalibre 45.
Hustisya usab ang singgit karon sa nahabiling pamilya ilabina sa anak sa biktima.
Ang patay nga lawas ang gi-atiman na sa nahabiling pamilya samtang padayon ang imbestigasiyon sa mga otoridad.