Papa patay, mama kritikal sa pagpanunggab sa anak

NANUNGGAB: Si Martin Fernandez, 26, nadakpan sa kapulisan sa Talisay City human niya pangdunggaba ang iyang mga ginikanan gamit ang kutsilyo (naa sa lamesa). (TALISAY CITY POLICE STATION)
NANUNGGAB: Si Martin Fernandez, 26, nadakpan sa kapulisan sa Talisay City human niya pangdunggaba ang iyang mga ginikanan gamit ang kutsilyo (naa sa lamesa). (TALISAY CITY POLICE STATION)

GIDUNGGAB sa anak nga adunay sakit sa pangisip ang iyang mga ginikanan sud sa ilang balay sa Sitio Libo, Barangay Mohon, Talisay City.

Nahitabo kini alas 3 sa kaadlawon sa Dominggo, Pebrero 23, 2020. Patay ang amahan nga si Juanito Perocho, 57, ug kritikal ang inahan nga si Jean Fernandez, 49.

Matod ni Patrolman Ariel Balde, imbestigador sa Talisay City Police Station, giingong gibadlong ni Jean ang ilang anak nga si Martin Fernandez, 26, kinsa gustong mogawas nianang pagkakadlawon.

Apan nasuko si Martin ug kalit nga gidunggab si Jean sa gidala-dala nga gamay nga kutsilyo.

Nakit-an ni Perocho ang nahitabo ug dali unta pud nga nipugong ni Martin.

Apan imbes nga maminaw, ang amahan na usab niini ang giatubang ug maoy gitusaktusak sa tiyan ug sa dughan.

Ang duha ka igsuong babaye na ang nisyagit og pakitabang, ug dayong sibat ni Martin.

Gidali sa pagdala sa tambalanan ang magtiayon apan patay na si Perocho.

Sa tabang sa mga silingan, nadakpan si Martin sa mga pulis sa kalibunan nga duol sa ilang balay alas 7:20 sa buntag sa susama nga adlaw.

Dala pa ni Martin ang kutsilyo.

Matod ni PCpl. Chad Mondares sa Talisay City Police Station, si Martin wala daw sa saktong paminsar.

Nagsugod ang pagkawala sa saktong paminsar ni Martin sukad niadtong niuli sa ilang panimalay nga wala na mopadayon sa pagbansay sa iyang pagkasundalo.

“Sa una masuko na gyud daw na siya basta pugngan nga molakaw, mag-wild. According sa iyang mga igsuon nga dili unang higayon na nga nakapasakit na siya sa iyang pamilya.

Mag-wild na siya, pero karon siya grabe nga kabayolente,” matod ni Balde.

Sa gipahibaw sa mga pulis si Martin nga napatay niya ang iyang amahan ug gipangutana kon nagbasol ba, giingon nga igo rang kining nitubag nga wala siya nagmahay sa iyang gibuhat. (BBT, FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph