CABLE car nga dili lang pang-turismo apan masakyan isip transportasyon sa yanong publiko?
Mao kini ang update nga giduso sa Department of Transportation (DOTr) isip parte sa Intergrated Intermodal Transport System sa Sugbo.
Mismo si DOTr Secretary Arthur Tugade gusto niining klase sa transportasyon tungod kay paspas kini himuon.
Matod ni Tugade kinsa nibisita sa Sugbo niadtong Sabado, Pebrero 22, 2020, nga manukad ang Urban Cable Car Project sa Sugbo sa Mactan Cebu International Airport paingon sa downtown Cebu City.
Matod niya, ang cable car program makaayo sa turismo sa Cebu ug makapapaspas sa lakaw o biyahe sa publiko. “The place where it will be coming from will be at the International airport going to downtown Cebu. What are we talking about? We are talking there of more than five million passengers moving.”
Base sa datus sa DOTr aduna’y ruta sa cable car ang MEPZ, IT PARK, Mandaue City, downtown Cebu, ug ang bukirang bahin sa Sugbo.
Mas dali ang cable system tungod kay anaa lang sa usa ka tuig ug upat ka buwan ngadto sa usa ka tuig ug pito ka buwan himuon, sigon ni Tugade.
Gusto usab ni Tugade nga karon untang 2020 masugdan na ang pagtukod niini. Wala siya mohatag og detalye kon aduna na kini’y pagtuon o kon aduna kini dokumento sa pagpatuman sa proyekto. Gibutyag usab ni Tugade nga sugod karong Marso 15, ipatuman na nila ang Interim Bus Augmentation Program gikan sa Fuente Osmeña paingon sa South Road Properties. (HBL)