Mga bus sugdan og padagan sa ruta sa BRT

BRT, CABLE CAR. Si Transportation Secretary Arturo Tugade nihatag og updates sa transportation program alang sa Cebu. (Alan Tangcawan)
BRT, CABLE CAR. Si Transportation Secretary Arturo Tugade nihatag og updates sa transportation program alang sa Cebu. (Alan Tangcawan)

KUMUSTA na ang Bus Rapid Transit (BRT) system sa dakbayan sa Sugbo kansang pundo ug mga dokumento dugay nang naandam?

Si Secretary Arthur Tugade sa Department of Transportation (DOTr) nipahibawo nga sugod Marso 15, 2020, adunay mga bus nga ibutang sa rota sa BRT.

Lakip sa ruta ang Fuente Osmeña paingon sa salot o habagatan sa Cebu City, matod ni Tugade atol sa iyang pagbisita sa Cebu niadtong Sabado, Pebrero 22, 2020.

Nitambong siya sa meeting kabahin sa proposed Metro Cebu Integrated and International Transport System (MCIITS) ug ga-speaker pud siya sa pundok sa Jaycees Metro Cebu Uptown chapter.

Si Tugade nibutyag nga magdepende ang gidaghanon sa mga bus nga ilang ibutang sa gidaghanon sa mga pasahero nga mosakay matag adlaw.

Si Land Transportation Office (LTO) 7 Regional Director Victor Emmanuel Caindec nagkanayon nga mosubay sa dedicated lane sa BRT ang maong mga bus ug adto mopasakay ug mopakanaog sa bus stops ug dili sama sa mga PUJ nga bisan asa ra hunong.

Dugang ni Caindec nga gitun-an sab sa buhatan ni Secretary Michael Dino sa Office of the Presidential Assistant for the Visayas (Opav) nga duhaon ka rota ang interim BRT, usa gikan sa SRP ug Bulacao o dapit sa Starmall sa Talisay City.

Ang Land Transportation Franchising and Regulatory Board maoy modeterminar sa pletihan apan si LTFRB 7 Regional Director Eduardo Montealto niingon nga wala pa sila makadawat og memorandum gikan sa ilang central office.

Iyang gipadayag nga kon special route ang BRT ang ilang head office maoy modesisyon sa plete apan kon dili, subayon nila ang taripa sa ubang aircondition nga PUV.

Matod ni Caindec, posibleng mogawas ang detailed engineering design sa buwan sa Abril ug magpadayon ang interim BRT hangtod nga mahuman ang tinuoray nga BRT nga ilang gibanabana nga mosugod og operate sa hinapos nga bahin sa 2021.

Base usab sa timeline sa DOTr, anaa sa Disyembre 2021 ang partial operations sa phase 1 sa BRT nga manukad gikan sa Cebu South Bus Terminal paingon sa Capitol samtang sa Marso 2022 ang partial operations sa Bulacao/Talisay paingon sa Talamban nga ruta.

Pasalig ni Tugade ngadto sa mga taga Cebu nga ipahimutang kini sa dili pa mahuman ang termino ni Presidente Rodrigo Duterte.

Si Tugade nakig-alayon ni Dino aron mapadali ang pagpatuman sa IITS sa Sugbo, gani nagtagbo usab sila niadtong Sabado.

Nagpabilin nga anaa sa Investment Coordination Committee sa National Economic and Development Authority (Neda) ang proyekto nga monorail sa Sugbo nga aduna’y kapasidad nga 12,000 ngadto sa 15,000 ka tawo matag oras matag direksyon.

Gipanglantawan nga karong 2020 kini masugdan o ilahang gitawag nga partial operability.

Dugang ni Tugade nga kadtong dili maigo sa rota sa BRT mao kadto ang butangan nila sa cable car ug monorail apan kinahanglan nga magtagbo kini aron mamahimong posible ang IITS.

Kining tanan nga ilahang gihimo, joint efforts kini sa local government units. (B)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph