DUHA ka nagmotorsiklo ang nangaangol ug anaa karon sa tambalanan human sila gidaro sa van buntag sa Dominggo, Pebrero 23, 2020 sa Maghaway Road, Barangay Lawaan 3 sa dakbayan sa Talisay.
Matod ni Patrolman Junel Labitad sa Talisay City Traffic ug imbestigador, nawad-an og brake ang Kia van nga gimaneho ni Erwin Mercado, 51, samtang padulhog ug nakasugat ang motorsiklo nga pasaka.
Ang gamaneho sa motor mao si Leonor Silva, 36, ug gaangkas si Ludevina Javerina, 60. Nangasamad ug nangapangos silang Silva ug Javerina, kinsa nabalian og bukton.
Si Mercado ug mga kabanay sa mga nadala sa tambalanan ang nagkasinabot ang matag habig nga abagahon sa drayber ang galastuhon sa pagpatambal nilang Silva ug Javerina ug dili na sila mopasaka og kaso, matod ni Labitad. (BBT)