SUPERBALITA CEBU

Cebu-Casino mipukan sa ARQ sa exhibition game

CEBU. Ang sakop sa Gilas Pilipinas nga si Rey Suerte, reinforcer sa ARQ Builders, nga gitabangan og depensa sa Cebu-Casino Ethyl Alcohol niining aktoha atol sa ilang exhibition game. (Hulagway ni Alan Tangcawan)

MIPAKATAP og 17 puntos si Raffy Oktubre, gawas sa iyang pito ka rebounds ug upat ka assists aron pangulohan ang Cebu-Casino Ethyl Alcohol ngadto sa 87-77 nga kadaugan batok sa ARQ Builders/KSB Glass sa usa ka exhibition game, Dominggo, Pebrero 23, 2020, nga gipahigayon sa Sports Institute Gym sa Sawang Calero, Dakbayan sa Sugbo.

Atubangan sa mga gipunsisukan nga mga Sugboanong basketball fans, hugot nga kombati ang nasaksihan nga gidayandayanan sa pagka-eject sa headcoach sa ARQ Builders nga si Marvin Caro tungod sa pagkomprontahi niini sa referee sa dihang wa tawagi og foul ang lusot ni Jojo Tangkay.

Naghinugtanay sa ilang bakus ang matag habig sa first quarter apan hinayhinay nga miinat sa ilang bintaha ang Alcohol Makers ni coach Noynoy Falcasantos sa tungatungang bahin sa ikaduhang kanto.

Ang layup ni John Lee Yu sa katapusang 6:27 segundos sa second quarter mao'y naghatag og 14 puntos nga labaw sa Casino, 41-27.

Apan sa panagkumboya nila ni Ferdinand Lusdoc, Reed Juntilla nga giabagan usab nila ni Frank Nylon ug sa reinforcer nga si Rey Suerte, ang Builders nakamaniho sa pagpahak sa bintaha, 50-43, pagkatapos sa second quarter.

Mibukad man tuod ang labaw sa Casino sa third quarter apan wa'y mopakita og timailhan ang Builders sa pag-surrender ug ang labing pinakaduol nilang nahimo mao ang 65-70, 8:59 segundos sa fourth quarter.

Si Lusdoc mipuga og 28 puntos alang sa Builders.

Subay niini, gibutyag ni Casino coach Falcasantos nga mopahigayon sila og tryout karong Abril dinhi sa Sugbo.

Sa pagkakaron, ila unang gitugotan ang mga players nga makabakasyon sa ilang tagsatagsa ka probinsiya.

"Mag-break lang sa mi ron but by April, magpa-tryout ta diri in preparation for the next season," matod ni Falcasantos sa dihang gikahinabi sa Superbalita.

Nasayran nga mosugod ang sunod season sa MPBL sa Hunyo.

Mga puntos:

Casino (87) - Oktobre 17, K. Villoria 15, Saycon 11, Galvez 10, Lao 10, Cortes 8, Ubalde 6, Lee Yu 6, Nunez 4.

ARQ Builders/KSB Glass (77) - Lusdoc 28, Juntilla 14, Tangkay 11, Suerte 6, Munoz 5, Tampararong 5, Godez 3, Nylon 2, Gabas 2, Sereno 1. JBM


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph